Rêber Apo li hemberî gefên li ser Herêma Kurdistanê pêşniyara “Hikumeta Yekîtiya Demokratîk” kir. Rêveberê Şaxê Silêmaniyeyê yê Partiya Komunîst a Kurdistanê Bêstûn Kemal bi rêya RojNewsê ragihand ku partiya wan piştgiriyê dide vê pêşniyarê.
Bêstûn Kemal qala guhertinên li Rojhilata Navîn kir û got: “Ew rewşa ku li Rojhilata Navîn derketiye holê tejî nakokî ye. Rewşa Kurdistanê ger di salên borî de ber bi pêş ve çûbe, îro ji ber tevlîheviyên Rojhilata Navîn, pirsa Kurd ber bi xirabiyê ve diçe. Ji ber vê yekê divê Kurd zanibin ka dê çawa tevgerê bi vê rewşê re bikin. Di vî alî de peyama Birêz Ocalan bi temamî niştîmanî û neteweyî ye. Ji ber ku Herêma Kurdistanê tevî wan hemû qurbaniyan niha di bin zextê de ye.”
Bêstûn Kemal diyar kir ku sedema zextên li ser herêmê pirsgirêkên navxweyî ne û wiha anî ziman: “Ev du salin hilbijartin hatiye kirin lê hikûmet nehatiye avakirin. Ji ber vê yekê ev peyam di dem û cihê xwe de ye û divê aliyên siyasî bernameyeke stratejîk deynin ka dê çawa bi vê rewşê re rû bi rû bibin. Berdewamkirina vê rewşê deriyê metirsiyên mezin li ser Herêma Kurdistanê vedike, bi taybetî ji aliyê Dadgeha Federal ve.”
Kemal bal kişand li ser nakokiyên di navbera PDK û YNK’ê de û wiha domand: “Pêwîstî bi avakirina encûmenekê heye. Ger ev herdû hêzên desthilatdar nikarin vî rewşê derbas bikin, wê demê aliyên din dikarin encûmenekê ava bikin û bi hev re li ser pirsgirêkan kar bikin. Wek Partiya Komunîst em dixwazin hikûmetek were avakirin ku xizmeta gel bike. Armanca wê peyama birêz Ocalan eve ku di navbera aliyan de bi yekîtiyê gav were avêtin. Ji ber vê yekê em wek Partiya Komunîst ji bo her tiştî amade ne.”
Bêstûn Kemal di dawiya axaftina xwe de tekez kir ku dikarin bi yekîtiyê destkeftiyên xwe biparêzin û wiha got: “Em daxwaz dikin ku alî, bi taybetî herdû hêzên desthilatdar, ji bo derbaskirina vê rewşê bifikirin. Erka aliyên derveyî desthilatê ye ku zextê bikin û divê gel jî zextê bike. Ji ber ku ev destkeftî ne yên desthilatê ne, yên gel bi xwe ne.”
Hêjayî gotinê ye ku Rêber Apo di nirxandina xwe de rewşa Rojhilata Navîn wek firtone û agirê bi nav kiribû û bal kişandibû ser wê yekê ku di vê serdemê de heman ew lîstika ku Îngilîzan Kurdistan pê dabeş kirin û bi birîndarî hiştin û Rojhilata Navîn serûbin kirin, dîsa tê lîstin. Îro her çar beş rûbirûyî wê yekê bûne ku her yek ji wan bibe Xezayek, ango pirsa Kurd wek pirsyareke mezin di navenda Rojhilata Navîn de ye û her dem dibe rojeva germ a welatên herêmê.
Ji ber vê yekê Rêber Apo pêşniyara rêbazeke çareseriyê ji bo Başûrê Kurdistanê kir û got: “Bila Başûrê Kurdistanê xwe ji bo van guhertin û qeyranên Rojhilata Navîn amade bike. Çareseriyeke wek hikûmeteke yekîtiya demokratîk pêwîste ku daxwazên hemû gelî bi cih bîne.”
