Xelatên 32’yemîn yên Mûsa Enter û Şehîdên Çapemeniya Azad, ji bo bîranîna Mûsa Anter ku di 20’ê Îlona 1992’yan de li Amedê ji aliyê JİTEM’ê ve hate qetilkirin, hatin lidarxistin. Merasîma li Navenda Çandê ya Cem Karaca ya li Bakirkoyê, bi beşdariya gelek rojnamevan, çalakvan û hunermendan pêk hat. Xelat di şeş şaxên cuda de hatin belavkirin: Nûçeya bi Tirkî, Nûçeya Vîdyoyî, Nûçeya bi Kurdî, Wêne, Karîkatur û Rojnamegeriya Jinê.
NÛÇEYA BI TIRKÎ
Di beşa Nûçeya bi Tirkî de xelata yekemîn ji bo xebata “Rêwîtiya Welatê Xerîbiyê” ji Bir+Bir Express’ê ji Adem Ozgur re hate dayîn. Xelat ji aliyê parêzera Bûroya Hiqûqê ya Asrînê Raziye Ozturk ve, ji ber ku Ozgur di sirgûnê de ye û nikaribû beşdar bibe, ji rojnamevan Omer Sonmez re hate pêşkêşkirin. Ozgur di peyama xwe de got: “Xelata bi navê Mûsa Enter wergirtin ji bo min hem şanaziyek mezin e hem jî berpirsyariyeke giran e. Hilgirtina mîrateya Apê Mûsa tê wateya berdewamkirina vegotina çîrokên Kurdan û hemû civakên bêdengkirî.”
Raziye Ozturk jî di merasîmê de silavên Rêber Apo ragihand û got ku pêvajo bi piştgiriya civakî dikare bi ser bikeve.
Xelata Taybet a Juriyê di vê şaxê de ji bo nûçeya “Jiyana wan tarî bû dema ku bavê zarokê ku bi wan re şer kiribû qeymeqam derket: Tiştên li qereqola Mezitlîyê qewimîn mirovan matmayî dihêle” ji HalkTv.com.tr’ê ji Cengiz Karagoz re hate dayîn. Xelat ji aliyê Zeynep Çelik a ji Înîsiyatîfa Ez Hewcedarê Aştiyê Me ve hate pêşkêşkirin. Çelik bang li çapemeniyê kir ku zimanê aştiyê bikar bîne û got: Hewcedariya me hemûyan bi aştiyê heye.
NÛÇEYA VÎDYOYÎ
Di beşa Nûçeya Vîdyoyî de xelata yekemîn ji bo hevpeyvîna “Vatanda İşkence” ji Voys Media’yê ji Tunca Ogreten û Murat Baykara re hate dayîn. Xelat ji aliyê Hevseroka Giştî ya Partiya Herêmên Demokratîk (DBP) Çigdem Kılıçgun Uçar ve hate pêşkêşkirin. Uçar bal kişand ser rola girîng a çapemeniyê di Pêvajoya Aşîtî û Civaka Demokratîk de.
WÊNE
Di beşa Wêneyê de xelata yekemîn ji bo xebata bi temaya “Koç” ji Zana Deniz re hate dayîn. Xelat ji aliyê Engin Cengiz ê ji MKM’ê ve ji rojnamevan Aziz Oruç re hate pêşkêşkirin. Zana Deniz di peyama xwe de diyar kir ku xelat ji bo hemû rojnamevanên şehîd hatiye wergirtin û bi taybetî behsa xebatên Cihan Bilgin û Nazım Daştan ên li Rojava kir.
KARÎKATUR
Di beşa Karîkaturê de xelata yekemîn ji bo xebata “Keder Değil” ji Nuri Dogan re hate dayîn. Xelat ji aliyê Rojdan Erez ê ji Kovara Modernîteyê ve hate pêşkêşkirin. Dogan di peyama xwe de got ku azadiya çapemeniyê beşeke azadiya gelan e. Xelata Taybet a Juriyê di vê şaxê de ji Mahmut Ulusan ê ku li Girtîgeha Eregli ya Konyayê girtî ye, hate dayîn û xelat ji aliyê Musa Şanak ve jê re hate şandin.
ROJNAMEVANIYA JINÊ
Di beşa Rojnamevaniya Jinê de Xelata Taybet a Juriyê ji bo nûçeya “Tevnek Bi Tevnek Têkoşîna Aşitiyê” ji nûçegihana JİNNEWS’ê Elfazi Toral re hate dayîn. Xelat ji aliyê çalakvana TJA’yê Hatice Başkale ve hate pêşkêşkirin. Toral bal kişand ser berpirsyariya jinên rojnamevan di gihandina rastiyê de û behsa berxwedana Dayikên Aşitiyê kir.
XELATA RÛMETÊ
Di merasîmê de Xelata Rûmetê ji bo rojnamevanên di têkoşîna rastiyê de şehîd bûne, Cihan Bilgin û Nazım Daştan, hate dayîn. Xelat ji aliyê rojnamevanên Ender Onder û Huseyin Kalkan ve ji malbatên wan re hate pêşkêşkirin.
PEYAMA YENİ OZGUR POLİTİKAYÊ
Xebatkarên Rojnameya Yeni Özgür Politikayê di peyama xwe ya ku di merasîmê de hate xwendin de, bal kişandin ser rola girîng a çapemeniya azad di vê qonaxa veguhêz de. Şeva xelatan bi performansa hunermend Haluk Tolga û Koma Vejîn bi dawî bû.
