Di 8’ê Kanûnê de Rêjîma Baasê ya 61 salî û desthilata Esadî ya 54 salî hilweşiya û Sûriye ber bi qonaxeke nû û hesas re diçe. Ciwanên Herêma Bakur û Rojhilatê Sûriyeyê yên ku bûne pêşengên civakê dikarin bi fikrê xwe yên demokrat civakek serkeftî ava bikin. Rola ciwanan di Sûriyeyê de ya herî giring e. Ji ber ku ciwan berhema civakê ne. Bi vê yekê pêwîst e hikûmeta nû ya Sûriyeyê mafê ciwanan biparêze û rê li ber hişmendiya pêşketina wan veke.
Têkildarî vê mijarê Hevserokê Meclisa Ciwanên Sûriyeya Demokratîk Nasir Nasir ji ajansa me re wiha axifî:
‘PÊWÎST E EM DI WELATÊ XWE DE SERBEST BIJÎN’
Nasir di destpêka axaftina xwe de anî ziman ku pêwîst e Sûriyeyeke pirrengî û bi her zimanî were avakirin û wiha pê de çû: “Pêwîst e bi pêşengtiya ciwanan Sûriyeyeke hevpar û azad were avakirin. Di heman demê de daxwaza me ne Sûriyeyeke bêmaf e, em dixwazin welatê ku em tê de bijîn xwedî hebûna me be, bi taybet hebûna ciwanan. Ciwan pêşengên her civakê ne, ji ber wê jî nabe rê li ber mafê ciwanan were girtin yan jî derheqê ciwanan de tiştên nebaş werin kirin. Pêwîst e em wek ciwan nêrîna xwe bikin yek û van siyasetên qirêj qebûl nekin. Ji ber ku dema em dibêjin ciwan welat tê bîra me. Divê tevahî ciwanên Sûriyeyê wateya ciwantiya xwe nas bikin.”
‘ŞOREŞA ROJAVA BINGEHA AZADIYA SÛRIYEYÊ YE’
Nasir diyar kir ku rêjîma Baasê bêhtirî 50 salî li ser desthilatdariya Sûriyeyê ma û hukmê xwe yê qirêj li ser gel meşand û wiha dewam kir: “Rejîma Baasê bi riya derbeyeke leşkerî hat ser desthilatdariya Sûriyeyê û em dikarin bibêjin ku malbata Esed welatê Sûriyeyê dagir kir. Her wiha piştî rabûna şoreşa Rojava ya ku bû çirûska azadiya jin û gelan, gelê herêma Bakur û Rojhilatê Sûriyeyê bi kedek mezin ev herêm kirin xwedî azadî û demokrasî. Piştî vê keda giranbiha û ketina bi hezaran şehîdan hikûmetekî nû hat ser desthiladariya Sûriyeyê ku xwediyê Îslama radîkal in û bi vê yekê dixwazin careke din vê pergala qirêj a Baasê vegerînin û bi yek olî gelî bi rê ve bibin.”
Nasir di berdewamiya axaftina xwe de anî ziman ku li ser xaka Sûriyeyê yek mezheb û yek ol nabe. Ji ber ku xaka Sûririyeyê bi ol û mezhebên xwe dewlend e. Nasir wiha axaftina xwe dewam kir û got: “Bi berxwedaniya gelê Sûriyeyê pergala Baasê hat hilweşandin, ji ber vê yekê jî pêwîst e bi taybet mafê jinan mafê gel di her alî de parastî be. Jinan li Sûriyeyê di têkçûna çeteyan de roleke bingehîn lîst û ev yek heya niha berbiçav e. Her wiha di destûra nû ya Sûriyeyê de pêwîst e her kes di her beşê de bikaribe cihê xwe bigire.”
Nasirê di dewamiya axaftina xwe de behsa daxwazên xwe yên di Sûriyeya nû de kir û got: “Rêbazê yekalî di Sûriyeyê de pêk nayên, em wek ciwanên Sûriyeya Demokratîk van siyasetan şermezar dikin. Ev hikûmeta nû dixwaze di reya şewreyên navxweyî, bêyî ku nûnertiya gel bikin destûrek nû ya Sûriyeyê binivîsin. Banga me ji tevahî gelê Sûriyeyê ew e ku em perdeya tirsê biqetînin û li dijî siyasetên qirêj yên hikûmeta nû ya Sûriyeyê serî hildin. Çibku ev dem dema berxwedanî û têkoşînê ye.”
