Partiya Jiyana Azad a Kurdistanê (PJAK) têkildarî 11’emîn salvegera jenosîda 3’yê Tebaxa 2014’an a çeteyên DAÎŞ’ê li ser Şengalê pêkaniyî, daxuyaniyek belav kir.
Daxuyaniya PJAK’ê wiha ye:
“Ji bo rizgarbûna Şengalê ji metirsiya komkujiyan û gihiştina azadiyê, hîna pêwîstiya Şengalê bi piştgiriyek berfireh a gelê me heye.
Şengal û Êzidî ji bo gelê me sembolên têkoşîna azadî û demokrasiyê ne. Di salvegera 11’emîn a jenosîda Şengalê de, em wekî PJAK, tevî şermezarkirina êrişên DAIŞ’ê û alîgirên wan, piştgiriya xwe ya giştî ji bo Rêveberiya Xweser a Şengalê û gelê wê radigihînin. Şengal û Êzdî emanetê gelê Kurd in.
Di 3’yê Tebaxa 2014’an de, di encama êrîşa koma sucdar a DAÎŞ’ê ya bi hevkariya xiyaneta hinek hêzên li Başûrê Kurdistanê, paşguhxistina xelkê Êzidî û reviyana ji Şengalê, her wiha piştgiriya dewlet û artêşa Tirk a dagirker de, li Şengalê fermana 74’an bi ser Êzidiyan de hate pêkanîn.
Gelê Êzîdî yê Şengalê, bi rastî sembola nasnameya dîrokî ya gelê Kurd û parêzvanê rewa yê çandek hezar salî ye ku nehiştiye ew were tunekirin. Rola xelkê Şengalê û ola Êzidî di parastina hebûna gelê Kurd de mezin û nayê înkarkirin.
Êrîşa li ser Şingalê, pêşxistina DAÎŞ’ê û piştgiriya Tirkiye ji bo koma terorîst, bi awayekî plankirî pêk hat û dewleta Iraqê û PDK’ê Şengalê bêxwedî û bêparastin hiştin.
Îro jî bi heman şêweyî Şengal jî di bin dorpêçê de ye, bi hezaran dîlgirtî hîn jî li benda rizgarbûnê ne. Heta niha jî gef û êrîşên din ên xeternak wekî beşek ji dagirkirin û komkujiyên mezintir ji hêla hêzên piştgir ve berdewam dikin. Ji bo rizgarbûna Şengalê ji metirsiya komkujiyan û gihiştina azadiyê, hîna pêwîstiya Şengalê bi piştgiriyek berfireh a gelê me heye.
Tevgera Azadiya Kurd û hêzên gerîla bi hemû hêza xwe bi fedakarî pêşî li komkujî û qirkirinê girtin. Îro bi saya fedakariya bi hezaran şehîdên ji her çar perçeyên Kurdistanê, Rêveberiya Xweseriya Demokratîk a Şengalê pêk hatiye.
Ev destkeftiya mezin, berhema gelê me yê li her çar perçeyên Kurdistanê ye û divê were parastin. Bê guman ev destkeftî berhema gelên bindeste, bi taybetî ya gelê Kurde û parastina wê erkê her kesî ye. Şengal û xwerêveberiya wê sembola mayîn an jî nemana hebûn û îradeya gelên Rojhilata Navîn e. Serkeftin û mayîndebûna vê sembola bi nirx tê wateya azadiyê, têkçûna wê jî tê wateya astengkirina bi dehan salan bidestxistina azadî, demokrasî û îradeya hemû gelên herêmê.
Îro jî, planên li dijî Şengalê bi senaryoyên piralî yên hinek hêzan û tedbîrên berê berdewam dikin. Paşeroja geş a Iraq û Herêma Kurdistanê bi azadiya xelkê Şengalê û xwerêveberiya wê ya xweser a demokratîk ve girêdayî ye.
Kombûna qeyranan û metirsiya şerê navxweyî yên li Iraqê wekî metirsiyeke din a mezin li dijî Şengal a dorpêçkirî tê hesibandin. Tirkiye jî bûye sedema şewatek mezin û metirsiyê girantir kiriye.
Partiya Jiyana Azad a Kurdistanê (PJAK) tevî şermezarkirina êrîşên DAÎŞ’ê û alîgirên wan, piştgiriya xwe ya giştî ji bo Rêveberiya Xweser a Şengalê û gelê wê radigihînin. Bîranînên hemû şehîdên mezin, di nav de şehîd Zekiyan û Dilgeşan ku bi fikir û ramana Rêber Apo ji bo parastina gelê Êzidî û Şengalê xebitîn, wê her tim zindî be.
Em bang li hemû gel û baweriyan dikin ku piştgiriyê bidin Şengalê û gelê wê û yekitî û yekgirtinek dîrokî pêkbînin.
Xelkê Şengalê tenê bi hêzên xwe yên parastina rewa û Rêveberiya Xweseriya Demokratîk dikare hebûna xwe biparêze. Jê wergirtina îradeya xwerêveberiyê ji Şengalê, tê wateya bêpar hiştina azadiya gelê Kurd a li her çar beşên Kurdistanê û bêpar hiştina gelê me ji pêşengiya gelên herêmê di pêvajoya azadî û demokrasiyê de.
Her senaryoyek komployê ya li dijî Şengalê wekî temamkirina jenosîda DAIŞ’ê û dewleta piştgirê wê tê hesibandin. Ji ber vê yekê, ji bilî darizandina sûcdarên komkujiyê, erkê gelê Kurd û azadîxwazane ku hebûna Şengalê wek sembola xwerêveberiya gelên Kurdistanê û Rojhilata Navîn biparêzin.”
