Platforma Parastin û Piştevaniya Bajêr a Amedê têkildarî civîna xwe ya Li Enqereyê ya li ser çareseriya pirsgirêka Kurd daxuyaniyek da. Daxuyanî li Baroya Amedê hate dayîn û gelek nûnerên saziyê yên girêdayî platformê beşdarî civînê bûn. Hevberdevka platformê û Serokê Baroya Amedê Abdulkadîr Guleç têkildarî hevdîtinan agahî dan.
Guleç diyar kir ku wan ji bo çareseriya pirsgirêka Kurd li Enqereyê bi partiyên siyasî re hevdîtin pêk anîne. Her wiha Guleç da zanîn ku divê pirsgirêka Kurd bi diyalogê were çareserkirin got ku ji bo ku ‘’pêvajoya nû’’ bi ser bikeve, weke gelek nûnerên rêxistinên civakî tevli hevdîtinên li Enqereyê bûne.
Piştre Seroka Komeleya Jinên Kardêr ên Rojhilat û Başûrrojhilat Ozlem Kulahçi Tanamanê li ser navê platformê daxuyaniyek da.
Tanamanê têkildarî hevdîtinên li Meclîsê yên di navbera 27-28’ê Çileyê de ên bi partiyên siyasî re ev yek anîn ziman:
‘’*Em ê pêvajoya çareseriya pirsgirêka Kurd ya bi rêya diyalogê bişopînin û piştgiriyê bidin,
* Di mijara pêkahatina aşitiya mayînde de li Amed û bajêrên derdora wê daxwazên cidî û bendawariyeke mezin heye,
* Divê pêvajo ji metirsiyên siyasî dûr bin û bi perspektîfeke ku mafên mirovan ên gerdûnî esas digire were birêvebirin,
*Divê yasaya ku rê li ber rayeya tayînkirina qeyûman vedike, were betalkirin,
* Divê girtin û binçavkirinên ku rê li ber siyaseta demokratîk didgirin, werin bidawîkirin,
* Ji bo ku astengiyên di qada perwerde û raya giştî de yên li pêşiya zimanê dayikê werin rakirin, divê sererastkirinên yasayî werin kirin,
*Divê tavilê dest bi çêkirina qanûna bingehîn a sivîl û demokratîk were kirin,
* Divê hebûna gelê Kurd a li Sûriyeyê ya girêdayî pêvajoya nû ya piştî hilweşîna desthilatdariya Esad were qebûlkirin û operasyonên leşkerî werin sekinandin,
* Divê astengiyên li pêşiya bicihanîna biryarên binpêkirinê yên ji aliyê Dadgeha Qanûna Bingehîn û AIHM’ê ve hatine dayîn, werin rakirin û me ji hemû muxatabên xwe re anî ziman ku dê ev yek rê li ber serketina pêvaoyê veke.’’
Ozlem Kulahçi Tanamanê da zanîn ku wan ji partiyên siyasî re xwestiye ku piştgiriya pêvajoya nû bikin û ji rayedarên AKP’yî re xwestiye ku dev ji sepanên xwe yên zirarê didin pêvajoyê berdin.
Tanamanê di dawiya axaftina xwe de bang li raya giştî kir ku piştevaniya pêvajoyê bikin û ev yek anîn ziman: ‘’Em dikarin pirskirêka Kurd bi rêyên aşitiyane çareser bikin ku li pêşiya me têkildarî vê yekê derfeteke mezin jî heye. Divê hemû beşên civakê piştevaniya vê pêvajoyê bikin. Her wiha bi vê wesileyê em ê xebatên xwe yên têkildarî pêkanîna aşitiyê bidomînin. Ji bo aşitiyeke adilane û birûmet; em bang li hemû partiyên siyasî, sendîka, saziyên pîşesazî, rêxistinên mafan, komeleyên jinan, înîsiyatîfên aşitiyê, rewşenbîr, nivîskar û rojnamevan dikin ku ji bo çareserkirina pirsgirêka Kurd a bi rêya diyalogê û pêkanîna aşitiya welêt hewl bidin û berpirsiyariyên xwe bi cih bînin.’’
18:5
