Rêxistina Ewropayê ya Partiya Yekîtiya Demokratîk (PYD) têkildarî êrişên komên çete yên ser bi dewleta Tirk a dagirker ên li nava hikumeta veguhêz li ser taxên Şêxmeqsûd, Eşrefiyê û Benî Zêd ên Helebê daxuyaniyek da.
Di daxuyaniye de hate ragihandin ku komên çete du roj in bi hemû hêza xwe êrişî taxan dikin û ev êriş dewama êrişên li Siwêdayê yên li dijî Durziyan û li herêmên peravî li dijî Elewiyan e.
Di daxuyaniyê de hate destnîşankirin ku şêniyên taxên Şêxmeqsûd, Eşrefiyê û Benî Zêd bi “ruhê yekîtî û îradeyeke şoreşgerî” li dijî êrişan li ber xwe didin.
Hate ragihandin ku êriş binpêkirina mafên mirovan e û polîtîkayeke li dijî hebûna gel e û hate destnîşankirin ku êrişş wê nikaribe îradeya gelan bişikîne.
PYD’ê bang li raya giştî ya navneteweyî û welatan kir ku li hemberî êrişan bi berpirsyariyê rabin.
Her wiha bang li gelan, derdorên dost, pêkhateyên Sûriyeyê û hêzên demokratîk li gelemperiya Ewropayê kir ku bi çalakiyan nerazîbûna xwe nîşan bidin.
