Partiya Yekîtiya Demokratîk (PYD) der barê êrîşa dewleta Tirk a dagirker a li dijî endamê wan Hogir Erebo û di encamê de şehîd bû de daxuyaniyek da.
Di daxuyaniyê de PYDˋê sersaxî da malbata şehîd û gelê herêmê û êrîşa dermirovî ya dewleta Tirk şermezar kir.
PYD’ê di daxuyaniya xwe de got, “Hogir Erebo ji malbateke welatparêz e. Li ser rihê nîştimanî û fedakariyê di nava malbateke welatparêze mezin bû. Hevrêyê me Hogir di nava rêxistina ciwanên partiya me de têkoşiya. Xwedî rihê şoreşgerî û têkoşînê bû. Dem û derfetên xwe dixist xizmetî xurtkirina birêxistinê û doza gelê xwe.”
Her wiha hat diyarkirin ku Hogir li kêlek keç û xortên Bakur û Rojhilatê Sûriyeyê sekinî û parastina gelê xwe li dijî êrişên DAIŞˋê û dewleta Tirk a dagirker ên li ser herêmê kir û birîndar bûbû. Ji bo tedawiyê rakirin nexweşxaneyên Başûrê Kurdistanê.
