Meclisa Gel ya Binarê Qendîlê û Komîteya Amadekar a pîrozbahiya Cejna Newrozê ta Binarê Qendilê ragihandin ku hemû amadekarî li qada pîrozbahiyê bidawî bûne, qada pîrozbahiya Newrozê amade ye û ew li benda beşdarbûna milyonek gelê Kurdin.
Meclisa Gel a Binarê Qendîlê û Şaredariya Binarê Qendîlê zêdetirî mehekê ye amadekariyên pîrozbahiya Cejna Newrozê dikin.
Hevserokê Meclisa Gel ya Binarê Qendîlê Aram Husên têkildarî mijarê wiha got; “Amadekariyên me yên ji bo pîrozbahiya Newrozê temam bûne. Di 19’ê mehê de li ser gorên şehîdan merasîmek bê lidarxistin. Di 20’ê mehê de emê emê meşeke bi meşale lidar bixin û agirê Newrozê pêxin. Di 21’ê mehê de jî dê pîrozbahiyek mezin a Newrozê were lidarxistin.”
Aram Husên di aliyê siyasî û netewî de tekezî bi girîngiya Newroza îsal kir û wiha got; “Çawa ku gelê me piştgirî da Rojava, divê bi heman ruh û hestan jî beşdarî Newrozê Qendîlê bibin. Ji ber ku Newroza îsal cuda ye ku em li vir di aştiyê de ne û aliyek din di şer de ye. Em dixwazin rojek dîrokî wekî Amedê tomar bikin û bêyî cudakariya ol, çand an partiya siyasî bi hev re Newrozê pîroz bikin.”
Hevşaredarê Binarê Qendîlê Dilşêr Îbrahîm bal kişand ser amadekariyan û wiha axivî; “Me ezmûna salên berê girt û rexneyên welatiyan kir bingeha xebata xwe. Me konteyner û odeyên endezyarî ji holê rakirin. Cihên manê, cihê park-kirina wesayîtan û xwaringeh bi teî amade ne. Her wiha xizmetguzariyên me dê çend rojan piştî Cejna Newrozê jî berdewam bikin.”
Têkildarî tedbîrên ji bo tenduristî û parastina welatiyan ya li Newroza Binarê Qendîlê, Dr. Fatima Salar ku ji tîma tenduristiyê ya Binarê Qendîlê ye wiha got; “Tîmên me di rewşa amadebaşiyê de ne; ambulans, kabînên tenduristî û pispor hatine dabînkirin da ku tu valahiya tenduristiyê nemînin. Her wiha em ji nêz ve dikan û bazaran dişopînin da ku pêşî li firotina kelûpelên demborî û zêdebûna bihayan bigirin.”
Komîteya Amadekar ya Newroza Binarê Qendîlê ji bo ku bi hev re dîrokeke nû ya têkoşînê û rekorek ya beşdariya pîrozbahiyê tomar bikin, bang li hemû gelê Kurd yê li her çar parçeyên Kurdistanê û azadîxwazan dikin ku beşdarî pîrozbahiya Cejna Newrozê ya Binarê Qendîlê bibin.
