Navenda Ragihandinê ya Hêzên Sûriya Demokratîk (QSD) derbarê êrîşên ku di rojên dawî de li herêmên Dêrazor, Der Hafir, Til Temir, Bendava Tişrînê û taxên Şêxmeqsûd û Eşrefiyê yên Helebê pêk hatin, daxuyanî da.
QSD’ê ragihand ku komên çekdar ên ku dewleta Tirk piştgiriya wan dike, di binê banê hikûmeta Şamê de zêdetirî 22 êrîşên bi çekên giran û bejahî pêk anîn.
QSD’ê bi bîr xist ku êrîş peymana ku di 1’ê Nîsana îsal de di navbera rêveberiya taxên Şêxmeqsûd, Eşrefiyê û reveberiya Şamê de hatibû îmzekirin binpê dike û wiha hate gotin:
“Komên çekdar bi çekên giran û bi bejahî ve êrîşî herêmên Bakur û Rojhilatê Sûriyeyê ve kirin. Her wiha hewl dan çemê Firatê derbas bikin da ku êrîşî nuqteyên hêzên me yên li Dêrazorê bikin. Di encama êrîşan de zêdetirî 11 sivîl birîndar bûn û zirarên mezin li qadên sivîlan bûn. Ev êrîş bi peyama hatiye îmzekirin re nakok e, nemaze ku cewherê vê peymanê agirbesta giştî, parastina sivîlan û pêşxistina derfetên çareseriya siyasî ye.
‘TEVÎ ÊRÎŞAN JÎ ME ARAMIYA XWE PARAST’
Ji ber baweriya me ku aramiya li Sûriyeyê hewcedarî tevkariyeke rasteqîn û berpirsyariya tevkar a hemû aliyan e, me di dirêjahiya dema borî de xwe ragirt, tevî êrîşan jî me aramî parast. Di demekê de ku pêdiviya Sûriyeyê bi diyalogê heye, lê dewamkirina êrîşan baweriyê tehdît dike û lihevkirinê ber bi têkçûnê ve dibe û hişmendiya şer zindî dike, hikûmeta Şamê jê berpirsyar e.
BANGA JI BO CIVAKA NAVNETEWEYÎ
Em bang li hikûmeta Şamê û komên girêdayî wê, komên ku destekê ji Tirkiyeyê digirin, dikin ku tavilê tevahî binpêkirinan rawestînin û pabendî bendên peymanê bin. Em bang li civaka navneteweyî û rêxistinên hiqûqî dikin ku binpêkirinan rawestînin û ji bo mîsogeriya rêzdariya li peymanan bixebitin. Ji bo Sûriyeyeke ewle û aram destê me ji diyalog û tevkariyê re vekirî ye, ji bo parastina ewlehî û mafên gelê xwe em amade ne tevahî tedbîran bigirin.”
