Navenda Ragihandinê ya Hêzên Sûriyeya Demokratîk (QSD) bîlançoya çalakiyên 24 saetên dawî yên li dijî êrîşên dewleta Tirk a dagirker û çeteyên wê weşand. Daxuyanî bi vî rengî ye:
“Şervanên me ku rasterast bersiva êrişên dewleta Tirk a dagirker û çeteyên wê didin, doh (Çarşem) li gundewarê bakurê Bendava Tişrînê li nuqteyeke kombûna çeteyan xist. Di encamê de kuştî û birîndarên çeteyan çêbûn. Hejmara kuştiyan nehat zanîn, lê bi qasî hat tesbîkirin 3 çete birîndar bûn. Du çeteyên din jî ku li motorsîklêtê bûn hatin kuştin.
Balafirên şer û yên bê mirov ên dewleta Tirk a dagirker êrişên xwe li derdora bendavê û cihên karkeran jî dewam kir. Balafirên bê mirov li nêzî gundê Xirbe Tiwênî nuqteyeke hêzên me bombebaran kir, di encamê de şervanek şehîd bû û yekî din bi sivikî birîndar bû.
Li Kobanê jî, balafirên şer ên dewleta Tirk a dagirker Mezreya Ehmed Munîr bombebaran kir. Di encamê de zerarên madî yên mezin li mezreyê bûn. Çeteyên li bajarê Cerablusê jî bi obîsên giran gundên Beyad û Cubna yê li rojavayê Kobanê topbaran kirin, lê top li erdekî vala kirin û zirar çênebûn.
Şervanên me li Girê Qereqozaxê û Girê Newroz du çalakiyên bibandor li dar xistin Di encamê de kuştî û birîndarên çeteyan çêbûn, bi qasî hat zanîn 3 çete birîndar bûne.
Balafirên bêmirov ên dewleta Tirk a dagirker di dirêjahiya rojê de li ser bajarokê Eyn Îsa û gundewarê digeriyan.”
