Dewleta Tirk a dagirker 23’ê Tebaxê li Başûrê Kurdistanê wesayîta rojnamevanan kir hedef û di encama êrîşê de rojnamevan Gulistan Tara û Hêro Behadîn şehîd bûn.
Endamên Ragihandina azad a Şengalê îro di saetên nîvro de li parka Serokatî ya Geliyê Kersê ya Şengalê kombûn û êrîşên dijî rojnamevavanan şermezar kirin.
Rojnamevanên Êzidî wêneyên du rojnamevanên şehîd Gulistan Tara û Hêra Behadîn rakirin, êrîşa dewleta Tirk a li dijî rojnamevanan û şîrîkên wan şermezar kirin û banga helwestê li sazî û dezgehên ragihandinê û rêxistinên parastina mafê rojnamevanan dikin, kirin.
Destpêkê Kedkara Çapemeniya Azad a Şengalê Rojbîn Hebabî axivî. Hebabî herdu rojnamevanên şehîd bi bîr anî û şifaya lezgîn ji hemû birîndarên êrîşa duh ya Seyîdsadiq re xwest. Rojbîn Hebabî bi navê hemû hevalên xwe yên rojnamevan sersaxî ji malbatên şehîdan û rojnamevanan re xwest û wiha got: “Ji ber rojnamevan dengê rastiyê ne û rastiyê eşkere dikin, lewma dewleta Tirk a dagirker êrîşê wan dike. Naxwaze êrîşên wan yên li ser gelan derbikeve holê. Em ji vir ji wan re dibêjin, wê êrîşên dewleta Tirk nekarin me rawestînin. Berovajiyê wê her êrîşek tê ser me hêza me mezintir dike. Her şehîdek em didin, me bihêztir dike. Ev dibe sedem ku em dengê xwe bilindtir bikin.”
Rojbîn Hebabî di dewama axaftina xwede îşaret bi hevkariya PDK’ê ya bi dewleta Tirk re kir û wiha pêde çû: “Dewleta Tirk bi alîkariya PDK’ê êrîşê rojnamevanan dike. Lê divê bizanin em ê tim li ser şopa şehîdên xwe bin û dê êrîşên wan nekare dengê me qut bike.”
Rojnamevan Îbrahîm Êzidî jî di daxuyaniyê de axivî. Îbrahîm Êzidî şehîd Gulistan Tara û Hêro Behadîn bi bîr anî û got: “Ew soza têkoşînê ya me berê niha ji şehîd Nûjiyan, şehîd Agir û şehîd Mirad re dabû, em careke din li vir dubare dikin. Çawa ragihandina azad pêşengiyê ji sîstema netewa demokratîk re dike, dezgehên ragihandinê yên PDK’ê jî pêşengiyê ji koletî û dagirkirina axa Kurdistanê re dikin. Beriya em bizanin hevalên me yên rojnamevan di wê seyareyê de ne, dezgehên ragihandinê yên PDK’ê dan. Ev jî dide nîşan ku çawa destê wan di êrîşan de heye.”
TAJÊ:PARÇEYA PLANA QIRKIRINÊ YE
Tevgera Azadiya Jinên Êzidî (TAJÊ) têkildarî qetilkirina rojnamevanên jin ên Kurd daxuyaniyeke nivîskî da.
Di daxuyaniyê de wiha hate gotin: “Di serî de em êrîşên dewleta Tirk ên bi hevkariya PDK’ê û Iraqê li ser axa Kurdistanê û gelê Kurd şermezar dikin. Êrîşa ku duh li Silêmaniyê hat pêkanîn li dijî wesayiteke rojnamevanan çêbû di encamê rojnamevan Gulistan Tara û Hêro Behadîn şehîd bûn. Ev êrîş bi plan bûn û êrîşeke li hemberî dengê jinên azad û gelê azad e.”
Di daxuyaniyê de hate destnîşankirin ku dewleta Tirk a dagirker bi salan e ji bo gelê Kurd nebe xwedî maf û statu, di nava şerekî mezin de ye û wiha hate gotin: “Ji bo ku li pêşiya deskeftiyên Kurdan bibe asteng û xewn û xeyalên dapîr û bapîrên xwe pêk bîne, her roj komkujiyan pêk tîne. PDK jî ji roja ava bûye ve heya niha weke projeyeke desthiladariyê li hemberî destkeftiyên Kurdan e. PDK bûye dijminê koka xwe û ji Tirkiyeyê bêhtir xizmeta Tirkan dike. Ji bo ku wan razî bike xwe ji wan re îsbat bike, Kurdistan û hemû gelê Kurd rojane dike qurbanî lê van salên dawî û bi taybetî ji sala 2023’an û şûnve Iraq jî bi şêwazeke vekirî tevlî planên qirkirina li ser gelê Kurd bûye. Ev li hevkirin roj bi roj encamên xirab bi xwe re tîne. Encam jî wêrankirin, talan, kuştin û koçberî ye. Her wiha ev lihevkirin, qirkirina li ser gelê Kurd e.
Tiştekî ku em ji wan hêvî bikin nemaye. Herî dawî herdu rojnemavanên jin qetil kirin û dezgehên ragihandinê kirin armanc. Ji ber ku rojnamevanên azad, her dem rastî û qirêjiya wan her wiha plan û lihevkirinên wan ên qirêj eşkere dikin, wan dikin hedef. Dixwazin kes bi qirêjiya wan nehese. Ev êrîş gihîştiye asteke herî xeternak. Hedefgirtina rojnamevanan tê wê wateyê ku dengê gel û rastiya heyî dikin hedef, ji bo wê jî ev êrîş li ser dengê gel e, li ser civakê bi xwe ye. Êdî dijminên me di êrîşên xwe de gihîştine asta bêexlaqiyê. Sûcên şer pir vekirî û bê hesab dikin.”
Di berdewamiya daxuyaniyê de wiha hate gotin: “Ji bo wê em weke tevgera jinan vê bangê dikin. Rewş her diçe xetertir dibe êdî ji bo tunekirina civakê çi ji destên wan tê dikin. Her kes dizane ku hêviya me ji tu hêzê nemaye. Hêviya me, ji gelê me û jinên azad heye. Bi sekn xwe û helwesta xwe ya zelal, em ê bikaribin gav bi dijimin paşve bavêjin. Ji bo wê jî tê xwestin ku em li her derê dakevin qadan û hesabê van êrîşan bixwazin. Êdî dem hatiye ku em serî rakin. Çareserî em bi xwe ne helwesta me bi xwe ye.
Herî dawî em vê dibêjin: Bi hedefgirtina pêşengên dengê heqîqetê, kes nikare pêşiya felsefeya Jin Jiyan Azadî bigre. Wê deng û felsefeyê, sînorê Kurdistanê û jinên Kurd derbas kiriye û bûye felsefeyeke cîhanî ku hemû jin bi wê felsefeyê diqîrin îro û li azadiya xwe digerin. Ji bo wê jî em dibêjin kesên ku dixwazin vî gelî tune bikin, ew ê tune bibin. Em careke din sersaxiyê ji malbat û kesûkarên Gulistan Tara û Hîro Behadîn re dixwazin. Her wiha sersaxiyê ji kedkarên çapemeniya azad ku ding û rengê jinên azad in re dixwazin. Serê gelê me sax be.”
