Ji destpêka pêngava Aştî û Civaka Demokratîk ve Rêber Apo ji Şengalê û civaka Êzidî re 3 peyamên taybet şandin. Her wiha di çend hevdîtinên cuda de derbarê statu û xweseriya Şengalê de nirxandinên girîng kirin. Civaka Êzidî jî du caran diyariyên xwe gîhandin Rêber Apo. Herî dawî jî Rêber Apo di hevdîtina xwe ya bi malbatê re ji bo civaka Êzidî û gelê Suryan pênûs diyarî kir. Endama têkiliyên derve ya Tevgera Azadiya Jinên Êzidî (TAJÊ ) Suham Şengalî derbarê peyam û diyariyên Rêber APO yên ji bo civaka Êzidî ji ANF’ê re axivî û got: “Di her hevdîtina bi Rêber Apo re girîngî ji bo civaka Êzidî hatiye dayîn û Êzidî bûne beşeke ji pêvajoyê.”
‘DIVÊ ÊZIDÎ JI HER KESÎ BÊHTIR XWEDÎ LI PÊVAJOYÊ DERKEVIN’
Suham Şengalî di destpêka axaftina xwe de ji bo diyarî û peyamên Rêber Apo dilxweşiya civaka Êzidî, bi taybetî jî jinên Êzidî anî ser ziman û got: “Ji destpêka pêvajoyê heya niha Rêber Apo girîngiyê dide civaka Êzidî û civak weke beşek ji pêvajoya heyî dide diyarkirin. Di serdema derbasbûyî de berê her kesî li şer bû, kesekî behsa aştî û çareseriyê nedikir. Herî dawî bi pêşengiya Rêber Apo û Tevgera Azadiyê pêngavek ku her kesî û bi taybetî jî civaka Êzidî jê sûd wergirt hate destpêkirin. Ji bo vê yekê jî ji her kesî bêhtir pêwist e civaka Êzidî xwedî li vê pêngavê derkeve.”
Suham Şengalî anî ziman ku civaka Êzidî ji dîroka xwe ve baweriya herî kevnar û aştîxwaz a gerdûnê ye û wiha dewam kir: “Ji ber vê yekê jî em weke gel û civaka Êzidî bi awayekî xwezayî ketin nava pêngava Aştî û Civaka Demokratîk a ji aliyê Rêber Apo ve hate destpêkirin.”
Endama Têkiliyên Derve ya TAJÊ Suham Şengalî her wiha bal kişand ser berxwedana civaka Êzidî û got: “Rast e, di tevahiya dîrokê de civaka Êzidî rastî gelek fermanan hatiye û li hember hemû fermanan jî li ber xwe daye. Fermana herî dawî jî nîşaneya wê yekê ye ku çawa civaka Êzidî civakeke berxwedêr û xwedî helwest û sekn e. Ji bo vê yekê jî Rêber Apo dixwaze ev ruhê berxwedanê her tim di nava civakê de zindî be.”
‘PÊWÎST E EM PEYAM Û DIYARIYÊN RÊBER APO FÊHM BIKIN’
Suham Şengalî diyar kir ku pêwîst e civaka Êzidî peyam û diyariyên Rêber Apo baş fêhm bike û got: “Weke ku ez bi xwe dibînim, bi vê diyariyê Rêbertiya me ji me zanebûnê dixwaze. Cara yekem behsa ronesansa Êzdiyan kir. Vê carê jî qelem diyarî civaka Êzidî kir. Ji bo vê jî pêwist e jin û ciwanên Êzidî xwedî li diyariya serok Apo derkevin û zanist û zanebûna xwe bi pêş bixin. Civaka Êzidî rastî gelek destanên lehengî û qehremantiye hatiye, di heman demê de rastî gelek ferman û êşan jî hatiye. Ev yek bi dîrokê nehatiye nas kirin. Civaka Êzidî heya roja me ya îro di warê xwe dane naskirina bi cîhanê de gelekî kêm maye û dîroka wan nehatiye nivîsandin. Êdî Serokatî vê yekê ji me dixwaze ku em xwedî li dîrok û hebûna xwe xwedî derkevin.”
Di dawiya axaftina xwe de endama Têkiliyên Derve ya TAJÊ Suham Şengalî soza xwe ya li sernavê civaka Êzidî anî ziman û got: “Em weke civaka Êzidî ji dil û can spasiya Rêber Apo û vê diyariya qedirbuha dikin û soza xwe ya dewamkirina pêkanîna xewn û xeyalên wî didin.”
