8’ê Adarê Roja Jinên Kedkar ên Cîhanê li seranserî cîhanê bi moral û coşek bi heybet ji aliyê jinan ve hate pêşwazîkirin, peyam û diyariyên Rêber Apo ruh û moral da tevahî jinan.
Hevseroka MXDŞ’ê Cîhan Celo di serî de roja 8’ê Adarê li Rêber Apo û tevahî jinên berxwedêr pîroz kir û got, ‘’Em weka jin di wê baweriyê de ne ku hêza me heye em ê bi karibin ji şer û aloziyên heyî re bibin bersiv û azadiyê mîsoger bikin. Weke jinên Êzidî em ê peyama Serok Apo ji xwe re bikin esas û li ser wê bingehê têkoşînê bimeşînin. Heya azadiya Rêbertî mîsoger dibe, em ê di nava têkoşîn û berxwedanê de bin. Ji her kesî bêhtir pêwiste civaka Êzidî xwedî li peyamên Rêber Apo derbikeve.”
Fermandara YJŞ’ê Viyan Hebabî jî nêrîna xwe bi boneya 8’ê Adarê anî ziman û di serî de ev roj li tevahiya jinên tekoşer, dayîkên şehîdan û Rêber Apo pîroz kir. Viyan Hebabî got, “Li tevahî civakan jin bi zextan re rû bi rûye. Lê bi fikir û felsefeya Rêber Apo niha zext hatiye şikandin. Di nava civakan de ger jin azad be hilweşandina wê civakê jî ne hêsan e, ji ber wê yekê jî dijmin her gavê xwestiye civakekê yan jî netewekê tune bike û lewma timî jin hedef girtiye. Jiyana tarî ya li jinê hatî ferzkirin, bi pêşengiya Rêber Apo hatiye ronîkirin.”
