Remziye Mihemed ji bo ANF’ê êrişên qirkirinê yên li ser Rojava û berxwedana gelê Kurd nirxand. Remziye Mihemed got ku ji aliyê çeteyan ve hedefgirtina taybet a jinê ji bo şikandina hêza ku civakê ava dike êrişeke bi zanebûn e û bêdengiya rayagiştî ya cîhanê li hember van sûcên şer rexne kir.
‘LI ROJAVA ŞOREŞA JINÊ TÊ HEDEF KIRIN’
Remziye Mihemed wiha axivî: “Di Rojava de 14 sal in şoreşek pêk tê û ev şoreş di heman demê de şoreşa jinê ye. Ev pêvajo bi îradeyeke mezin û bi pêşengiya jinê pêk hatiye û di heman demê de avakirina jiyaneke nû ye. Bi vê şoreşê re jin bûne şervan, siyasetmedar, hevserok, aborînas û perwerdekar.
Di hemû êrişên qonax bi qonax li ser herêmê de jin tên hedefgirtin. Ji ber ku di vê şoreşê de rola pêşeng digirin. Gelek hevalên jin ên pêşeng bi SÎHA’yan hatin hedefgirtin; Zeynep, Hefrîn, Rihan û gelekên din bi vî awayî hatin qetilkirin.
Bi taybetî di êrişên li taxa Şêx Meqsûd de careke din jin hatin hedefgirtin. Bi avêtina cenazeyê şervaneke ewlehiya hundir ji qata duyemîn, dixwestin li hember gel û jinên şoreşger psîkolojiya tirsê biafirînin. Armanc ew e ku rola jinê di berxwedan û têkoşînê de bi tirsê biguherînin. Armanca din jî ew e ku rola jinên pêşeng û şervan bi têgînên mîna ‘namûsê were tepisandin û tirs li civakê were ferzkirin.
Li Tabqa û Reqayê bi hovitiyekê mezin êrişî jiyana mirovan kirin. Bi birîna porê şervaneke jin dixwestin tirsê bigihînin asteke din. Bi êrişên li ser cenazeyan jî xwestin tirsê mezintir bikin.”
‘TÊKOŞÎNA JINÊ WÊ HOVITIYÊ BIŞKÊNE’
Remziye Mihemed bal kişand ku gelê Kurd li qadan û li kêleka şervanên xwe li hember tirs û hovitiyê dixwazin biafirînin rawestiyaye û wiha domand:
“Bi rêbazên şerê taybet, sûcên şer û bêexlaqiyê nikarin berxwedana rast a gelê Kurd paş ve bixin. Gelê Kurd îro rabûye ser piyan û bersiva herî bihêz daye. Ev êriş hemû hovitiyê ne, dermirovî ne û sûcên şer ên eşkere ne. Komkujiyên li ser gelê me tên kirin û êriş li ser cenazeyan tên kirin. Ev hemû li ber çavên cîhanê diqewimin, lê mixabin rayagiştî ya cîhanê di bêdengiyeke mezin de ye.
Îro siyaset û bazarên qirêj ên li ser gel û jinên me tên meşandin ber bi komkujiyên mezin ve diçin. Ev komployeke mezin e. Armanca vê komployê tunekirina şoreşa jinê û bêbandorkirina wê ye. Îro li Rojava sekna jinê, cihgirtina wan li kêleka şervanan, beşdarbûna wan a têkoşînê û hêz dayîna wan a ji têkoşînê re wê komplo vala derxîne. Jinên me îro pêşengên berxwedana Rojava ne; li kêleka şervanên xwe ne, di nava berxwedana YPJ û YPG’ê de ne û heta dawiyê wê gelê xwe biparêzin.
Careke din bang li hemû cîhanê dikin: Xwedî li Şoreşa Rojava û destkeftiyên jinê derkevin.
Hikûmeta demkî ya Şara rasterast hebûn, îrade û mafên jinê dike hedef û ji bo tunekirina wan êriş dike. Dixwaze jin di warê edalet, çand, siyaset û rêveberiyê de cih negirin. Ji ber ku çand û têgihîştina rêveberiyê ya dixwazin ava bikin, hemû rengan ên gelan ji holê radike. Piştî komkujiyên Dûrzî û Elewiyan, niha dixwazin qirkirina li ser gelê Kurd pêk bînin.”
‘LI HEMBER PLANÊN KOMKUJÎ Û QIRKIRINÊ YÊN LI KOBANÊ TÊBIKOŞIN’
Remziye Mihemed diyar kir ku îradeya gelê Kurd dixwazin înkar bikin û li Sûriye bi êrişeke ku hemû cudahiyan bifetisîne re rû bi rû ne û wiha got:
“Em ê li hember van êrişan di nava berxwedan û têkoşînê de bin. Di van êrişan de herî zêde zarok û jin zirarê dibînin. Zarok li rêyên koçberiyê jiyana xwe ji dest didin, dayîk nikarin xwarinê ji zarokên xwe re peyda bikin, êriş bi komkujiyan bi dawî dibin. Niha bi dorpêçkirina Kobanê re zarok ji sermayê û birçîbûnê jiyana xwe ji dest didin. Ev êrişên ku maf û jiyana Kurdan dike hedef, bi armanca komkujî û qirkirinê hatine plankirin.
Her kes hedefê van êrişan e. Bi taybetî gelê Kurd û rayagiştî ya cîhanê divê li hember van komkujî û sîvîlan di mirinê hîştînê de têkoşînê bike. Gelê me xwedî hêza derbasbûna vê dorpêçê ye. Me tu carî êrişî kesî nekiriye; em ji bo parastina gel û destkeftiyên xwe di parastinê de ne û em ê tu carî ji vê yekê tawîz nedin.”
