Rêveberiya Xweser a Şengalê derbarê rewşa her 5 şervanên YBŞ’ê ku di 18’ê Adara îsal de ji aliye artêşa Iraqê ve hatibûn girtin de bi daxuyaniyekê bang li Serokwezîrê Iraqê Mihemed Şiya Sûdanî kir. Rêveberiya Xweser a Şengalê di daxuyaniyê de bal kişand ser têkoşîna hevpar a YBŞ’ê û artêşa Iraqê ya li dijî DAÎŞ’ê û ji Sûdanî daxwaz kir ku di van rojên ku civaka Êzidî amadekariya Cejna Çarşema Serê Salê dike, her 5 şervanên YBŞ’ê azad bike
Daxuyanî ji aliyê hevserokê MXDŞ’ê Nayîf Şemo bi zimanê Erebî hate dayîn.
Berfirehiya daxuyaniyê wiha ye :
‘’Gelê me ya Êzidî, yek ji bingehên eslî yên Iraqê ye û wekî xwêya vê axê di navbera Dicle û Firatê de dimîne. Di dîrokê de her dem bûye mînaka sekna niştimanî û helwesteke netewî ya bi rûmet. Ruxmê ku di sala 2014’an de rastî fermaneke hovane hat, îro roj em hê jî rûbirûyê bandorên vê komkujiyê ne. Me şahidiya komkujî, esîrbûn û pêkanînên dermirovahiyê kir. Hê jî bi dehan gomên komî şahidiya vê hovitiyê dikin, çarenûsa bi hezaran kesên me yên wenda jî nayê zanîn. Ev trajedi, bi awayeke cidî hebûn û siberoja me hedef girtiye.
‘EM DIXWAZIN ZAROKÊN ME WERIN BERDAN’
Ji ber vê sedemê, li ser navê Rêveberiya Xweser a Şengalê, pêkhateyên Şengalê, oldar û hemû civakê ji rayedarên dewletê yên rêzdar hêvî dikin ku bi çavê dadperwerî nêzî mijara zarokên me yên girtî bibin. Derbarê vê mijarê de ji bo hemû saziyên fermî yên eleqeder serlêdan hatiye kirin, ji raya giştî re daxuyanî hatine dayîn. Em weke civaka Êzidî daxwaz dikin ku di arifeya Cejna Çarşema Serê Nîsanê de zarokên me serbest bêne berdan. Bila ev cejn bibe peyama dewleteke xurt ku xweşbînî, yekîtiya netewî û edalet lê serwer e.
Ev herêm heta niha bi rewşekî mirovahî ya dijwar re dijî û hewceyî tevgerên zû yên avakirina nû ye. Pêşkêşkirina xizmetên bingehîn dê bixwe bibe sedema pêbaweriya herêmê û rê li ber provokator û endamên “qûtba pêncêmîn” bigire ku nikaribin valahiyên ewlehiyê îstîsmar bikin.
‘BILA DEWLET BERSIVÊ BIDE DAXWAZÊN ME’
Baweriya me bi hewldanên we yên ku yekîtîya Iraqê xurt dike tam e. Em bawer dikin ku gavên we yên ku wê edaletê esas bigire, wê rûmeta hemû pêkhateyên Iraqê biparêze. Em hêvî dikin ku ev daxwaza me ji aliye dewletê ve were bersivandin û ev weke serkeftinekî ku hevgirtina hemû pêkhateyan xurt dike bikeve nav pelên dîrokê.’’
