Rêveberiya Xweser a Şengalê ji ber rewşa dawî ya ku li Şengalê qewimî li Şehîdgiha Şehîd Berxwedan û Dilgeî daxuyanî da Çapemeniyê. Daxuyanî ji aliyê Berdevkê Rêveberiya xweser a Şengalê Xwedêda Berkat ve hate xwendin.
Di daxuyaniya Rêveberiya Xweser a Şengalê de ev tişt hate gotin:
LI CIHÊ ÊRÎŞKAR BÊN CEZAKIRIN, ÊRÎŞÊ CIVAKÊ DIKIN
“Civaka Êzidî ya Şengalê civaka herî kevnar a li ser vê axê ye. Ruxmê ku bi dehan ferman, qetlîam bi ser wê de hatine hîna jî koka xwe parastiye û li ser koka xwe maye. Piştî ku rejîma Sedam Hisên hilweşiyaye, em di wê baweriyê de bûn ku hikûmeta nû rewşek ji bo civaka Êzidî ava bike ku ev komkujî û zilm careke din bi ser me de neyê. Rojekî ji rojan civaka me ti serhildan û xwepêşandan li dijî hikûmetê nekirine, lê ji bo parastina vî welatî me ked daye. Lê me di dawiyê de dît, di sala 2007’an de dema ku Şengal rû bi rûyî êrîşeke terorîstî hat ne ev dewlet ne jî pêşmergeyên girêdayî PDK’ê parastina me nekirin. Û piştî êrîşê pêwîst bû ku hikûmeta Iraqê li pey wan sûcdaran bigere û wan ceza bike. Lê ji bo vê yekê jî ti tişt nekiriye û di fermana 2014’an de jî bi heman awayî nêz bûye. Di vir de jî, bi heman awayî PDK’ê û dewleta Iraqê gelê me bi tenê di nava lepên DAÎŞ’ê de hiştin. Lê bi alîkariya şervanên azadiyê Şengalê karî xwe ji nû ve ava bike û hêzên xwe yên leşkeri saz bike, xwe ji destê çeteyên DAÎŞ’ê û fermanan biparêze.
Di wan deman de, dewleta Iraqê jî li dijî DAÎŞ’ê dest bi çalakiyan kir û herêmên xwe ji kontrola DAÎŞ’ê rizgar kir. Ruxmê van hemû tiştan jî me hebûna dewletê ya li ser axa Iraqê red nekir, me hatina wan erênî dît. Lê dewlet bi xwe van hemû rastiyan vedişêre û ji wan jî tifaqa 9’ê Cotmeha 2020’an bû ku xiyanetê li civaka Êzidî kirin. Ev jî dihat wateya ku civaka Êzidî vegere mîna beriya sala 2014’an. Vê yeke dihişt ku ew hêz û rêxistin a ku li Şengalê hatiye avakirin were tinekirin û rê li ber ferman û talanan were vekirin.
ÊRÎŞA LI DIJÎ HÊZÊN ME GIRÊDAYÎ PEYMANA 9’Ê COTMEHÊ YE
Di 18’ê Adara îsal de, artêşa Iraqê li hemberî hêzên YBŞ’ê li navenda bajarê Şengalê kemîn danîbûn bi hinceta ku şexsek hatiye revandin, ruxmê ku ew kes ne di destê YBŞ’ê de bû. Ruxmê vê rastiyê jî hêzên Iraqê êrîşî şervanên YBŞ’ê kirin, 5 şervanên YBŞ’ê birîndar kirin û ew girtin. Piştî vê êrîşê jî dewletê, hêzên YBŞ’ê weke hêzên ne fermî binav kirin. Li şûna ku van hêzan weke hêzên ku li ber axa xwe bi sedan şehîd dane û civak ji fermanê xilas kirine bihesibînin, şervanên YBŞ’ê weke hêzên ne fermî hesibandin. Di vir de xuya dike û tê famkirin ku ev yek jî ji Peymana 9’ê Cotmehê ne qut e ku dixwazin vê peymanê pêk bînin. Pêwîst e dewleta Iraqê û hevkarên wê li ser civaka Êzidî bazariyê nekin.
DIVÊ DEMILDEST ŞERVANÊN YBŞ’Ê SERBEST BÊN BERDAN
Em weke Rêveberiya Xweser a Şengalê ev tiştê ku artêşa Iraqê pêk aniye bi tundî şermezar dikin û pêwîst e hikûmeta Iraqê ji civaka Êzidî û hêzên parastina Şengalê YBŞ’ê lêborînê bixwaze û wan şervan û birîndaran berde.”
