Rêber Apo 18’ê Adarê nameyek ji bo civaka Êzidî şand û têde diyar kir ku pêvajoya ku hatiye destpêkirin herî zêde wê bibe ronesansa Êzidiyan.
Îro Rêveberiya Xweser a Şengalê li navenda Şengalê bi daxuyaniyeke çapemeniyê bersiva nameyê da û rojbûna Rêber Apo ku dikeve 4’ê Nîsanê pîroz kir. Di daxuyaniya ku ji aliyê Hevseroka Meclîsa Xweseriya Demokratîk a Şengalê (MXDŞ) Cîhan Celo ve hate dayîn de, hate gotin, wan weke civaka Êzidî hêz û moraleke mezin ji peyamê girtine û ji bo perspektîfên Rêber Apo yên ji bo Êzidiyan pêk were, dê têkoşîna xwe mezin bikin.
Berfireha daxuyaniya MXDŞ’ê wiha ye:
“Nameya Rêber Apo ku ji bo civaka me şandibû, gihîşt destê me. Me ji vê nameyê hêz, moral û kelecanekî mezin girt. Em ê bi vê hêz, moral û kelecanê pêvajoya ku di pêşengtiya Reber Apo de, bi Banga Civaka Aşitî Demokratîk ” hatiye destpêkirin, asta tekoşîna xwe hîn xurtir û bilindtir bikin. Rêber Apo êşên jenosîdê pir kûr hîs dike. Ji bo careke din ferman neye jiyîn, perspektifa bihêzkirina baweriya Êzdiyatî û felsefeya azadiyê de dide me. Rêber Apo di nameyê de dibêje; ‘Ev bang Ronesans e (Nûvejîn) û herî zêde jî wê ji bo civaka me yê Êzidî Ronesans be.’ Em ê jî vê ronesansê li ser bingeha rêxistinkirin û xweparastina xwe jiyanî bikin.
Nameya Rêber Apo bihara 2025’an weke tovê li nav axê bireşînê, bi barîna baranê re şîn bibe, bi tîhna germahiya rojê gul û çîçeka veke û bi bêhna xwe Şengalê xweş bike, bû. Bi vê teyisînê paşeroja me, jinûve bi roniya rojê re vebû. Bi stêrkan şewq da û bi bawerya Êzdiyatî re hat strandin û kemilî. Di vê wateyê de, dem dema azadiya Êzdiyatî ye, ev dem jî bi teyisîna paradîgmaya Rêber Apo li Şengalê hilat. Êdî civaka Êzidî bi demboriya paşerojê bi hêviyên siberojê kêliyên azadiyê bi îlhama ‘Civaka Demokratîk’ dihûne.
Azadiya Şengalê bi azadiya Rêber Apo re girêdayî ye. Ji ber yên herî zêde muxtacê azadiyê Êzidî ne û yê herî zêde tekoşîna azadiyê dimeşîne Rêber Apo ye. Em dizanin azadiya me Êzidîyan bi azadiya Rêber Apo re pêkan e.
Em bi van hestan bi coş û kelecaneke mezin ber bi roja rojbûna gelan a 4’ê Nîsanê ve diçin. Roja 4’ê Nîsanê, li hemberî koletî, ruhê mirî, hestên ziwa û jina tune hatî hesibandin vejîn kir û dîroka azadiyê da destpêkirin. Em bi îsrar û bi bîryardarî ber bi heqîqeta pêşerojek azad û serkeftinê ve dimeşin û bi wateya vê rojê ku roj li ser çîyayê Şengalê hilbê, bi rêz û hezkirinekî bêdawî Rêber Apo silav dikin û bêrîkirinên xwe rêdikin. Em bi perwerde û avakirinê civaka demokratîk pêşbixin û Ronesansa xwe pêk bînin.
Dubare em bi hêviya dîtina Rêber Apo û mîsogerkirina Şengala Xweser û Azad Rojbûna Rêbertiya Azad li hemû mirovahiyê pîroz dikin.”
