Fermandariya Giştî ya YPJ’ê bi wesîleya 13’emîn salvegera damezrandina xwe daxuyaniyeke nivîskî weşand.
YPJ’ê, diyar kir ku ew îro salvegera 13’emîn a damezrandina YPJ’ê bi coş û serbilindiyeke mezin pîroz dikin û got “Di vê roja watedar ku rastî rojbûna Rêber Apo, sembola têkoşîna wekhevî û edaletê tê, em careke din hêza berxwedan û hevgirtina enternasyonal silav dikin.”
Daxuyaniya Fermandariya Giştî ya YPJ’ê bi vî rengî ye:
“Di vê roja watedar de em tevahî şehîdên YPJ’ê ên qehreman bi hurmet û minetdariyeke mezin bibîr tînin û soza bilindkirina têkoşînê nû dikin. Şehîdên me yên dilwêrek ji bo welat û gelê xwe bi awayek fedayî li berxwedan û bûn sembola têkoşîna serxwebûn û azadiyê. Nirxa herî mezin a ku weke mîrasekî diyarî me kirin, li ser van xakan mafê jiyana azad e. Şehîdên me hêz û rûmeta me ne. Bîranîna wan herdem di dilê me de zindî dijî.
Bi wesîleya vê roja watedar em tevahî şervanên dilwêrek ên YPJ û enternasyonal ku ji sala 2013’yan heya niha li hemberî hêzên çete û dagirker li berxwe didin û şerê azadiyê didin meşandin bi serbilindiyeke mezin silav dikin.
Her wiha em bi hêrseke mezin bermahiyên DAÎŞ’ê ku di 27 Mijdara 2024’an de di pêşengiya HTŞ’ê de bi îdiaya ku ew li dijî rejîma Baas in derbe pêk anîn û bi vê hincetê herkesê li pêşiya xwe qetil kirin û bi taybet li dijî gelê me yê Elewî sûcê mirovahiyê pêk anîn, şermezar dikin.
Têkoşîna me ya bê rawestan ji bo jinên Sûriyê û tevahî jinên cîhanê bû rênîşanek. YPJ’ê azadiya tevahî gelan parast û heya roja me ya îro ji bo tevahî jinan, gelan û mirovahiyê dibe çavkaniya hêz û îlhamê.
YPJ’ê di sala 2013’yan de weke perçeyek ji têkoşîna azadiya jinê li Rojavayê Kurdistanê hate damezrandin û di nava demeke kin de bi berxwedana xwe ya li dijî çeteyên DAÎŞ’ê li tevahî dinyayê deng veda. Ev berxwedana bê hempa ya li dijî hovîtiya DAÎŞ’ê ne tenê şerekî leşkerî bû, di heman demê şerê azadî, nasname û rûmeta jinê bû. YPJ’ê ne tenê li Rojava, li tevahî cîhanê bû sembola têkoşîna berxwedan û azadiya jinan. Ev berxwedan ne tenê ji bo jin û gelên Rojava, ji bo tevahî jin û gelên cîhanê hêvî û daxwaza azadî û wekheviya civakî xurtir kir.
Hizrên Rêber Apo ên di derbarê azadî, wekhevî, demokrasî û zayendiya civakî de, kevirên bingehîn ên têkoşîna YPJ’ê ava kir. Rêber Apo bawer kir ku azadiya jinê wê rê li ber azadiya civakê veke, ev perspektîf ne tenê li Rojava, li tevahî cîhanê bû bingeha bilindkirina têkoşînê.
Di vê roja watedar a 4’ê Nîsanê de em ne tenê berxwedana YPJ’ê ya li hemberî DAÎŞ’ê pîroz dikin, di heman demê de em feraseta azadî û wekheviyê ya ku Rêber Apo bi jinê daye qezenc kirin pîroz dikin. Ramanên Rêber Apo, rehendeke enternasyonalîst bi YPJ’ê da qezenc kirin û ji her çar aliyên cîhanê jinan berê xwe dan warê şoreşê. Di nava refên YPJ’ê de jinên ji çand û nasnameyên cuda hatin gel hev û di heman çeperê de mil bi mil li dijî DAÎŞ’ê şer kirin û bingeha hevgirtineke kûrewî avakirin. Ev hevgirtina enternasyonal ji bo azadiya tevahî jinan û gelan pir girînge.
YPJ’ê ne tenê li dijî DAÎŞ’ê, li dijî avahiya desthiladar a cîhanî şer kir. Ev têkoşîna ku ji bo tevahî jin û gelan hate dayîn weke mîrasê hizir û ramanên Rêber Apo ye. Îro em di salvegera damezrandina YPJ’ê de ji hêza berxwedanê û ji felsefeya azadiyê ya Rêber Apo îlham digrin û bi vê hêzê em di rêya azadî, wekhevî û edaletê de bi gavên hê xurtir pêş de diçin. Em bi vê bîr û baweriyê careke din vê roja watedar pîroz dikin.
Azadiya jinan, azadiya gelan e. Têkoşîna YPJ’ê ne tenê têkoşîna gelekî ye, têkoşîna tevahî mirovahiyê ye. Em ê bi hev re di nava hevgirtina enternasyonal de gavên xurtir bavêjin, bi vê baweriyê em careke din salvegera damezrandina YPJ’ê û rojbûna Rêber APO li tevahî jinan û gelan pîroz dikin.”
