Hevserokê Navenda Civaka Demokratîk a Kurd (NAV BERLÎN) Huseyîn Yilmaz banga “Aştî û Civaka Demokratîk” a Rêber Apo ji ANF’ê re nirxand û got ku divê li ser vê bangê li Kurdistan, Tirkiye û Rojhilata Navîn pêvajoyeke nû ya civakî û siyasî pêş bikeve.
Yilmaz destnîşan kir ku divê dewlet dev ji polîtîkayên xwe yên înkar û zextê berde û wiha got, “Bêyî avakirina eniyeke demokrasiyê ya berfireh aştî jî demokrasî jî ne pêkan e.”
Huseyîn Yilmaz destnîşan kir ku divê bi bingehgirtina perspektîfa çareseriyê ya Rêber Apo nîqaş bi perspektîfekî berfireh werin rêvebirin û bilêv kir ku ji bo çareseriyekî demokratîk di sê qadên bingehîn de pêwîstî bi seferberiyekî berfireh heye.
Yilmaz diyar kir ku divê tifaqekî ku hemû hêzên li Tirkiye û Kurdistanê bigire nava xwe were avakirin û destnîşan kir ku ev pêvajo ne tenê ji bo gelê Kurd ji bo demokratîkbûna giştî ya Tirkiyeyê jî girîng e.
Yilmaz îşaret bi diasporaya Kurd a li Ewropayê û derdorên demokrasiyê kir û wiha got, “Pêkhateyên Tevgera Azadiyê yên li Ewropayê, ji mezinkirina têkoşîna civakî û xebatên civaka demokratîk berpirsyar in.”
Yilmaz destnîşan kir ku di asta berfireh de jî avakirina jiyaneke hevpar a aştiyane ya bi gelên Rojhilata Navîn re tê hedef kirin û got, “Weke ku Birêz Ocalan pêşbînî kir, têgiştina siyaseteke nû ku çanda jiyana hevpar a gelan esas digre, li herêmê bingeha aştiya mayînde ye.”
Huseyîn Yilmaz diyar kir ku divê dewleta Tirk di vê pêvajoyê de ji berpirsyariyên xwe nereve û ji ber polîtîkayên rojane vê derfeta dîrokî winda neke û herî dawî wiha got, “Pirgirêka Kurd ne bi zextê, lê bi rêyên demokratîk dikare were çareserkirin. Divê têgihîştina ku bi gotina ‘terorê’ civakê wêder dike, were dev jê berdan. Komîsyona ku wê li Meclîsê were avakirin, divê di vê milî de bêyî ku dem winda bike dest bi xebatên ji bo çareseriyê bike.”
