Gaziya şerê Bakur û Rojhilatê Sûriyeyê Ronahî Dêrik der barê şoreşa Kurdistanê rol û mîsyona gaziyan a di şoreşê de nêrînên xwe anîn ziman.
Ronahî Dêrik diyar kir ku Şoreşa Kurdistanê di pêşveçûna xwe ya dîrokî de û nexasim jî destpêkê bi gelek zehmetî û êşan re rû bi rû hatiye û got, “Heya roja me ya îro jî rastî zehmetiyan tê. Beşek ji Şoreşa Kurdistanê jî Şoreşa Rojava ye ya bi gelek çîrokên berxwedanê yên balkêş ên xweş û bi jan dagirtî ye.”
Ronahî Dêrik anî ziman ku têkoşîna azadiyê li ser bingehê xeta berxwedanê bi Şoreşa Rojava re berdewam kir û ev anî ziman, “Qehremantî û lehengtiya keç û xortên Kurd li tevahî cîhanê dengê xwe veda. Ew ked û lehengî di heman demê de bû mîrateya berxwedana civakan. Gelek kesayet hene ku tenê navê wan heye. Ew kesayet weke qehreman û egîdan têne dîtin. Lê pir kêm kes dizanin bê ew leheng çawa û bi çi awayî ev şoreş bi ser xistine û bi çi hestan li ber xwe dane. Ji ber wê jî divê di pirtûkan de behsa wan şervanên ku Şoreşa Rojava bi ser xistine û di oxira wê de parçe ji bedena xwe dane bê kirin. Hewce ye çîrok û jiyana wan lehengan teqez bê nivîsandin û mirov wan bike malê dîrokê.”
Ronahî Dêrik bal kişand ser şoreşên li cîhanê pêş ketine û wiha axivî, “Li gelek welatan kesên di şoreş û şeran de cih girtine, piştî şoreş bi ser dikeve weke gazî tên binavkirin. Lê hîn jî Şoreşa Rojava bi dawî nebûye û berdewam dike. Di şoreşa Rojava ya weke Şoreşa Bakur û Rojhilatê Sûriyeyê jî tê nasîn de mirovên birîndar bûne û parçe ji canê xwe dane, li hemû qadan di nav kar û xebatan de ne. Ango nabêjin, “Em êdî bûne gazî. Em birîndar im û êdî em tiştekî nakin.’ Rêber Apo jî di Şoreşa Kurdistanê de rola herî mezin a pêşengtiyê daye gaziyên şer û dibêje, ‘Divê gazî ji berê bêhtir bixebitin.’ Em jî bi vê serbilind in ku Rêber Apo rol û mîsyoneke wer daye gaziyên şer. Eger mirov li bersiva pirsa ‘Di şoreşa Kurdistanê de gazîbûn çi ye?’ bigere, pêwîst e mirov li jiyan, têkoşîn û berxwedana hevalên şehîd binêre. Bi dehan hevalên me yên gaziyên şer tevî hemû birînên xwe jî li qadên şer di nav berxwedanê de cih girtin. Dêrsim Amed, Deştî Amanos, Hedar Amed, Eylem Tolhildan, Polat Efrîn û sedan hevrêyên wiha vê heqîqetê nîşanî me didin.”
Di mijara jiyana azad de jî Ronahî Dêrik wiha axivî, “Eger ferd xwe di azadiyê de, kilîd bikin ti tiştek nikare li pêşiya wan bibe asteng û wan rawestîne. Gaziyên şoreşê jî xwe di azadiyê de kilît kirine. Ew hevalên me qala wan kir du car yan jî sê caran birîndar bibûn. Tevî vê jî di meşa xwe ya azadiyê de her bi israr bûn. Heya dawiyê li hemberî dagirkeran têkoşîn kirin û canê xwe ji bo azadiyê feda kirin.”
Ronahî Dêrik axaftina xwe wiha bi dawî kir, “Bi rastî mirov ji jiyana wan hevalan, ji têkoşîn û israra wan a ji bo serkeftinê îlham digirt. Mirov pêwîst dibîne li hemberî wan rexnedayîna xwe bide. Bi hurmet û minetdarî wan şehîdên qehreman bi bîr tînim û soza xwe ji wan re nû dikim.”
