Ji endamên Fermandariya Biryargeha Navendî ya YJA Starê Emîne Erciyes (Nazli Taşpinar) 20’ê Nîsana 2020’î li herêma Garê di encama êrîşên dewleta Tirk de şehîd bû. Hevrêya wê gerîlaya YJA Starê Rûken Jîrkî qala têkoşîn û berxwedana şehîd Emîne Erciyes kir.
Rûken Jîrkî anî ziman ku wê demeke dirêj bi şehîd Emîne Erciyes re hevrêtî kir û got, “Beriya her tiştî di şexsê hevala Emîne, hevala Zîn û hevala Ekîn de şehîdên şoreşa azadiyê hemûyan bi bîr tînim, li pêşberî bîranîna wan bi rêzdarî bejna xwe ditewînim. Me bi hevala Emîne re demeke dirêj hevrêtî kir, em hevrêyên hev ên têkoşînê bûn. Bêguman hevala Emîne xwe bi rengê herî baş da nasandin û vegotin. Em jî weke hevrêyên Emîne divê wê her kêliyê bi bîr bînin. Dema ku mirov hevala Emîne dinirxînin dîroka jinê, dîroka civaka me, dîroka civaka Tirk, kesayetiya ku bi felsefeya Rêber Apo gihîşte wê, tê bîra mirovan. Ji ber ku haya hevala Emîne ji rastiya Rêbertî, rastiya civaka me, rastiya şehîdan, tinehesibandina jinên Kurd û Tirk ji aliyê desthilatdariyê ve hebû.
Hevala Emîne ji her alî ve hevaleke parvekar bû, dema pêwîst bû dibû hunermend, dibû sînemager, dibû şanoger, dibû fermandara artêşê, fermandara YJA Starê. Em dikarin bibêjin ku xwedî hemû taybetmendiyên jin ên azad, taybemetmendiyên jin ên Apoyî û sosyalîst bû. Ev taybetmendî di jiyana wê de dihate xuyakirin. Dema ku mirov hevala Emîne vedibêje yan jî bi bîr tîne, gotin têrê nake ku bedewî, fikirên wê yên azad, sekna wê ya azad vebêjin. Ji xwe di jiyana xwe de bi rengekî baş nîşan dida bê miroveke çawa bû. Di şexsê hevala Emîne de mirov dikarîbû bidîta ku jinek di rastiya Apoyî de çiqasî dikare xwe bi pêş ve bibe, xwe zane bike.”
‘JIYANEKE GELEKÎ BI WATE JIYA’
Gerîla Rûken Jîrkî diyar kir ku endama Fermandariya Biryargeha Navendî ya YJA Starê Emîne Erciyes 26 salan bê eman li nava Tevgera Azadiyê ya Kurdistanê têkoşiya û bi vî rengî dewam kir, “Hevala Emîne li hemberî mejiyê serweriya mêr, li hemberî sîstema modernîteya kapîtalîst li çiyayên Kurdistanê, li Mezopotamyayê, li xaka pîroz 26 salan bê eman têkoşîn meşand. Jiyaneke gelekî bi wate derbas kir û jiya. Hevala Emîne temsîlkara Jin, Jiyan, Azadî bû, nûnera gerîlatiya modernîteya demokratîk bû, fermandara serketinê bû, li nava YJA Starê, li çiyayên Kurdistanê fermandara pêşeng a şerê tunelan bû. Li gel ku dijminê dagirker teknolojiya herî pêşketî li hemberî gerîlayên Kurdistanê bi kar anî jî hevala Emîne bi rêbaza xwe ya fermandariya serketî bû pêşenga jin a azad, bû pêşenga artêşa me. Têkoşîna hevala Emîne, têkoşîna li çiyayên azad meşand, têkoşîna li nava refên Apoyî meşand, weke pêşenga PAJK’ê bû nûnereke nirxên komunal ên têkoşînê.
Şerê vê yekê kir Hevala Emîne xwe li ser bingeha fikrên komunal bi pêş xistibû, sosyalîst bû. Ji xwezayê hez dikir, diparast, ji hemû zindiyan, ji mirovan hez dikir, ji hemzayendên xwe hez dikir, bi rengekî zane tevdigeriya. Weke fermandara me ya YJA Starê bi hemû derfetên xwe ji bo afirandina jin a azad li ser bingeha fikrên Rêber Apo hevrêyên xwe perwerde dikir. Hevala Emîne kedeke mezin da şervanên azadiyê, gerîlayên Kurdistanê. Li qada perwerdeyê girîngî dida hişmendiya jinê, hezkirina jinê. Eger em heta îro têkoşînê dimeşînin ev yek bi saya mîrateya berxwedanê ya hevala Emîne ye. Li vê qadê gelekî ked da.”
‘NÎŞANÎ HER KESÎ DA KU TÊKOŞÎNA JINÊ DIVÊ ÇAWA BÊ MEŞANDIN’
Gerîlaya YJA Starê Rûken Jîrkî anî ziman ku şehîd Emîne Erciyes mînaka herî mezin a têkoşîna hevgirtî ya gelan bû û axaftina xwe bi van gotinan bi dawî kir: “Bêguman hevala Emîne li her qadê kedeke mezin da. Dema ku mirov bala xwe didin ser qada hunerê dibînin ku hevala Emîne li gel derfetên kêm di hunerê, şano de çawa mirov afirîner dibe, ev yek bi berhem, têkoşîn û sekna xwe nîşan da. Ev yek ji bo me hemûyan mînak e. Nîşan da ku li nava refên tevgera azadiyê, li nava refên gerîla kesayetek azad çawa tê afirandin, têkoşîna jinê divê çawa bê meşandin. Hevala Emîne hevaleke Tirk bû, lê belê ji bo gelê Kurd, ji bo xwişk û biratiya gelan, ji bo xwişk û biartiya gelên Kurd û Tirk têdikoşiya, têkoşîna demokrasiyê dimeşand. Ji bo azadiya jinê têdikoşiya. Yanî em dikarin bibêjin ku hevala Emîne pêşenga tevgera azadiyê ya jinê bû, pêşenga demokrasiyê bû, pêşenga xwişk û biratiya Kurd û Tirk bû.
Ji ber vê yekê hevala Emîne nîşanî her kesî da ku jinên Kurd, Tirk, Ereb, Azerî, Fars li nava refên gerîla, bi îdeolojiya azadiyê ya jinê di pêşengiya partiya me PAJK’ê de digihêje kîjan asta herî bilind. Eger îro jin li qadan, li qadên siyasî, li qadên aborî û leşkerî têkoşînê dimeşînin, ji bo azadiya xwe îradeya xwe nîşan didin, bêguman ev yek bi saya mîrateya hevala Emîne û hevrêyên weke wê ye. Hevrê Emîne heqîqeta Rêber Apo, heqîqeta şehîdan dida jiyîn. Li ser bingeha mîrateya ku şehîdan ji me re hişt, ji bo serxistina armanc û wezîfeyên me hevala Emîne 26 salan têkoşiya. Lewma ji bo me jinan, ji bo me civaka Kurd, ji bo civaka Tirk, ji bo jinên Tirk mînak e. Hevala Emîne mînaka herî mezin bû ku nîşan dida ku mirov çawa dikare bibe sosyalîst, enternasyonalîst û ji bo hevgirtina gelan têbikoşin.
Bêguman şehadeta hevala Emîne ji bo me çiqasî giran jî be weke hevrêyên wê, heta jin azad bibin, heta jin îradeya xwe ya azad nîşan bidin em ê têkoşîna xwe mezin bikin. Yek ji wezîfeyên me yên herî mezin ev e. Ji niha û pê ve li her cihî, li her qadê em ê têkoşîna hevala Emîne dewam bikin û hêjayî şehîdên xwe yên şoreşê bin. Heta serketinê em ê li ser şopa wan bin. Careke din di şexsê hevala Emîne de hemû şehîdan bi bîr tînim û bi rêzdarî bejna xwe li ber bîranîna wan ditewînim.”
