HTŞ, DAÎŞ û komên paramîlîter ên piştgiriya Tirkiyê distînin, êrîşên xwe yên li ser Bakur û Rojhilatê Sûriyê didomînin. Di demekê de ku êrîşên li ser Bakur û Rojhilatê Sûriyê didomin, gelê Kurd û dostên wan û enternasyonalîstên ku seferberiyê ragihandine, li her çar aliyên herêmê berxwedanê mezin dikin. Yên ku li dijî êrîşên li ser Rojava nerazî ne, diçin sînorê Rojava û piştgiriya xwe didomînin.
Sabahat Erdogan Saritaş a ku ji ANF’ê re axivî, wiha got: “Ji 6’ê Çile û vir ve li Rojava êrîşeke berfireh li ser destkeftiyên ku gelê Kurd bi berdelên mezin bi dest xistiye heye. Ji wê rojê û vir ve gelê Kurd serpiyan e. Li hemberî van êrîşan hemû gelê Kurd xwedîderketineke mezin nîşan dide. Li çar aliyên Kurdistanê gel serpiyan e. Îro li vir careke din hate dîtin ku ji bo me tu wateyê sînoran nîne. Me careke din dît ku gelê Kurd bi temamî xwedî li nirx û destkeftiyên xwe derdikeve.
Êrîşên li ser Rojava ne tenê li dijî gelê Kurd in, di heman demê de êrîşên li dijî yekparebûna Sûriyeyê jî. Em dibînin ku dixwazin careke din şer û kaos li Sûriyê serdest bibe. Lê belê Rêveberiya Xweser a Rojava di heman demê de ji bo Rojhilata Navîn modela derketinê ye jî. Gelê Kurd, parastina jiyana hevpar û wekhev a hemû bawerî û nasnameyan dike û îro li vir serpiyan e.”
‘ARMANCA ÊRÎŞAN, DESTKEFTIYÊN KURDAN E’
Sabahat Erdogan Saritaş bal kişand ser armanca sereke ya êrîşan û diyar kir ku hedefgirtina destkeftiyên gelê Kurd e û wiha domand: “Têgihiştina netew-dewletê careke din xwe dispêrê daneyên sedsalî. Dixwazin gelê Kurd careke din bê statû, bê gotin û bê nefes bihêlin. Ji ber ku modela ku gelê Kurd li Rojava ava kiriye ji bo gelan modelek mînak e, ev êrîş zêde dibin. Me mehên dirêj dît ku Alewî, Suryanî, Xiristiyan û Dûrzî çawa yek bi yek tên qetilkirin. Ji ber vê yekê ev êrîş bi taybetî statuya ku gelê Kurd bi dest xistiye hedef digirin. Di heman demê de êrîşeke li dijî aramî û jiyana hevpar a li Rojhilata Navîn e jî.”
HER KESÊ KU DIJMIN E KURDAN E, HEVKARÊ VAN ÊRÎŞAN E
Sabahat Erdogan Saritaş ji sekinandina êrîşan banga yekîtiyê kir û wiha got: “Her çiqas di pêvajoya Kobanê de yên ku gotin ‘Kobanê ket, dikeve’ hebûn jî, xelet derketin. Gelê Kurd, bi xwedîderketina li nirx û gelê xwe re dîrokeke berxwedanê ya mezin nîşan da. Îro jî yên ku gotin ‘Birayê min Şara’, di bîra gelê Kurd de wekî lekeyeke reş dimînin. Gelê Kurd her tim li hemberî êrîşan bûye yek. Her kesê ku dijminê Kurdan e, maf û hiqûqa gelê Kurd nas nake, hevkarê van êrîşan e; dijminê yên ku aştiyê diparêzin e jî.
Gelê Kurd, wekî her tim, wê yekîtiya xwe biparêze û xwedî li statuya xwe derkeve. Îro gelê Nisêbînê careke din nîşan da ku ji bo me tu wateyê sînoran nînin. Ji gelê me re banga me ev e: Parastina Rojava nirx e, wijdan e. Em banga hemû gelê xwe dikin ku xwedî li Rojava derkevin.”
