Bi boneya salvegera 22’yan a Serhildana 12’ê Adarê ya Qamişloyê (2004) li herêma Cizîrê merasîm hatin lidarxisitn, daxuyanî hatin dayîn û gorên şehîdan hatin ziyaretkirin.
QAMIŞLO
Meclisa Bajarê Qamişloyê daxuyaniyek li Stadyuma Şehîdên 12’ê Adarê da. Bi sedan ji şêniyên bajêr, nûnerên Rêveberiya Xweser, rêxistin û tevgerên jinan, Meclisa Malbatên Şehîdan, saziyên civaka sivîl, partiyên siyasî û tîmên sporê di daxuyaniyê de amade bûn.
Piştî deqeyeke rêzgirtinê cîgirê hevserokên Meclisa Bajarê Qamişloyê Ehmed Ebûsî bi zimanê erebî û mamoste Henan Bekir bi zimanê kurdî daxuyanî xwend.
Di daxuyaniyê de hate gotin: “Îro salvegera 12`ê Adarê ye, rojek ku di bîra gelê Kurd û hemû gelên Sûriyeyê de hatiye nivîsandin e. Di vê rojê de di sala 2004’an de, rejîma Baasê li bajarê Qamişloyê sûcekî din li dijî gelê me kir. Bi guleyên zindî êrîşê sivîlên bêçek kir, di encamê de bi dehan kes şehîd bûn bi sedan kes jî birîndar bûn hatin girtin. Ev komkujî ne bûyerek tenê bû, lê belê encama polîtîkayên dûrxistin û zordariyê bû ku rejîma Beasê bi dehan salan li dijî gelê Kurd domand. Ji înkarkirina nasnameya wan heya bêparhîştina ji mafên wan ên bingehîn û hewldana guhertina pêkhateya demografîk a herêmên me.
Xwîna şehîdên 12’ê Adarê bû agirê berxwedanê û bajarên Kurdan Cizîr, Kobanê û Efrîn ji bo parastina rûmet û azadiyê rabûn ser piyan. Ji wê rojê ve, 12ê Adarê bûye sembola têkoşîna gelê me ji bo edalet, naskirin û mafê jiyana azad li ser axa xwe. Îro piştî ketina rejîma Baasê û bidawîkirina serdemeke dirêj a zordarî û zulmê, em li ber qonaxeke dîrokî ya nû ne. Ev qonax daxwaz dike ku em hemû -Kurd, Ereb, Suryan, Asûr û pêkhateyên Sûriyeyê- bi hev re bixebitin da ku Sûriyeya demokratîk li ser bingeha naskirina maf, edalet û wekheviyê ava bikin.
Di vê salvegerê de, em bi rêzgirtineke mezin giyanê şehîdên serhildana 12’ê Adarê û hemû şehîdên azadiyê di Sûriyeyê de bi bîr tînin û tekez dikin ku xwîna wan vala naçe. Her wiha soza xwe ya ji bo berdewamkirina têkoşîna siyasî û demokratîk dubare dikin. Avakirina pergala demokratîk ne-navendî mafên hemû pêkhateyan biparêze. Salvegera 12’ê Adarê ne tenê bîranîneke bi eş e, di heman demê de bîranîneke îrade û berxwedanê ye. Îradeya gelekî ku rê neda neheqiyê û biryar da ku dîroka xwe bi destên xwe binivîsîne.
GIRKÊ LEGÊ
Meclisa Bajarê Girkê Legê jî bi amadebûna endamên saziyên sivîl û hejmareke şêniyên bajar daxuyaniyek li Qada Azadî da.
Endamê Meclisa Malbatên Şehîdan Beşîr Sofî daxuyanî xwend. Di daxuyaniyê de hate diyarkirin ku Serhildana 12’ê Adarê xaleke werçerê di dîroka têkoşîna gelê Kurd de bû û wiha hat domandin, keç û xortên Kurd li hember zulm û paşguhkirinê rabûn û ji bo azadî û rûmetê berdêlên mezin da.
Her wiha hate destnîşankirin ku ev serhildan li hemberî siyasetên înkara nasname, îrade û çanda gelê Kurd qêrînek bû û hate gotin, ku bîranîna Serhildanê peyama nû ye ku îradeya gelê Kurd nayê şikandin.
AMÛDÊ
Meclisa Bajar û Gundewarên Amûdê daxuyaniyek li Qada Jina Azad da. Daxuyanî bi amadebûna endam û rêveberên meclisê û saziyên civaka sivîl ji aliyê hevserokê meclisê Ebdulbaqî Omer ve hat xwendin. Omer anî ziman ku Serhildana 12’ê Adarê qonaxeke girîng di têkoşîna gelê Kurd de bû. Hat bibîrxistin ku gelê Kurd li hemberî alava şer a rejîmê rabû û jib o azadî û rûmeta xwe bi dehan şehîd û sedan birîndar da û bi hezaran hatin girtin.
Di daxuyaniyê de banga diyaloga nîştimanî kir ku bi sazkirina destûreke daîmî ku mafên hemû pêkhateyan mîsoger bike, encam bibe.
TIRBESPIYÊ
Şêniyên bajarê Tirbespiyê, Meclis Malbatên Şehîdan û meclisên bajar û bajarokên Tirbespiyê, serdana gorên şehîdên serhildanê yên li bajarokên Til Marûf û Hilwayê kir.
Li bajarê Hilwayê serdana gora şehîd Mihemed Emîn Seyid kir û gurzên gulan danîn ser gora wî. Li vir rêvebera Meclisa Malbatên Şehîdan Xerma Elî axivî û diyar kir ku Serhildana 12’ê Adarê bû çirûska Şoreşa Sûriyeyê ya li hemberî rejîma Baas’ê.
Bi navê malbata şehîdan, Hesen Mihemed jî anî ziman ku ew bi şehadeta şehîdên serhildanê serbilind in û keda şehîdan pêşî li hewldanên fitne û despotîzmê girt.
Li bajarokê Til Marûf jî serdana gora şehîd Ziyad Yûsif hat kirin. Ji rêveberên Meclisa Malbatên Şehîdan Hisên Xalid axivî û got, Serhildana 2004’an de xaleke digîrng di meşa têkoşîna gel de bû.
ÇILAXA
Şêniyên bajar û gundewarên Çilaxayê û endamên saziyên sivîl û partiyên siyasî serdana gora şehîdê Serhildanê Ehmed Mirî Mihemed a li gundê Abirê kir û merasîmek hat lidarxistin. Di merasîmê de endama Meclisa Malbatên Şehîdan Ahîn Şiwêş daxuyanî xwend. Di daxuyaniyê de hate diyarkirin ku Serhildana 12’ê Adarê sekna rûmetê ya li hemberî rejîma Baas û siyasetên wê yên paşguhkirinê bû. Her wiha hate gotin, çiqas êriş zêde bin îradeya gel naşkê.
Di dawiya daxuyaniyê de soza domandina rêya şehîdan hate dayîn.
Birayê şehîd Ehmed Mirî Cemîl Mirî axivî û soza şopandina rêya şehîdan û parastina destkeftiyên gelê Kurd da.
DÊRIK
Meclisa Malbatên Şehîdan a Bajarê Dêrikê bi çalakiyekê şehîdên serhildanê Hisên Ehmed û Welîd Şahîn bi bîr anîn.
Şênî ku tev li çalakiyê bûn, ji !ada Azadî ber bi goristana Dêrikê ve meşiyan. Li goristanê piştî deqeya rêzgirtin, hevserokê Meclisa Bajarê Dêrikê Lawîn Cidai axivî.
Lawîn Cidai da zanîn ku Serhildana 12’ê Adarê îsbat kir ku gelê Kurd bi yekitiya xwe karibû planên qirkirin û koçberiyê vala derxistin û diyar kir ku serhildan bû sembolek di dîroka gelê Kurd de. Cidai hişyarî li ser hewldanên derxistina fitneyan di navbera Kurd û Ereban de kir û destnîşan kir ku dê rê nedin senaryoya komkujiya Qamişloyê dûbare bibe û dê aştiya navxweyî biparêzin.
Di dawiya çalakiyê de gul danîn ser gorên şehîdan û dirûşmên dilsazoiya bi şehîdan re hatin berzkirin.
