Şandeya Îmraliyê ya Partiya Wekhevî û Demokrasiyê ya Gelan (DEM Partî), bi daxuyaniyekê îdîayê nivîskarê Halk TV’yê Ugur Ergan ê ku dibêje “Ocalan serbestberdana Demîrtaş asteng kir” derewand.
Daxuyaniya şandeyê bi vî rengî ye: “Di nivîsa nivîskarê Halktv.com.tr Ugur Ergan a bi sernavê “Îdîaya ku Ocalan serbestberdana Demîrtaş asteng kiriye” de gotinên ku ji Birêz Ocalan re hatine gotin rastiyê nîşan nadin. Di hevdîtinên me yên bi Birêz Ocalan re bi ti awayî nirxandineke bi vî rengî nehat kirin. Di seranserê pêvajoyê de, di navberên cuda de, ji aliyê beşek diyar a medyayê ve nêzîkatiyek bi zanebûn hate nîşandan; Li ser bingeha îdîayên nerast spekulasyonên domdar hatine kirin. Diyar e ku ev yek dê ti feydeyê nede Pêvajoya Aştî û Civaka Demokratîk a li welêt.
Îtîraza Wezareta Edaletê ya li dijî biryara DMME’yê nîşan dide ku desthilatdarî qanûnê bi kar tîne. Berpirsyariya girtina nehiqûqî ya Birêz Demîrtaş û hevrêyên me yên din ku ji ber doza Kobanê hatine girtin ne girêdayî DEM Partiyê, an jî Ocalan e.
Ugur Ergan jî baş dizane ku rewş wisa ye.
Demildest berdana Demîrtaş, Yuksekdag û girtiyên siyasî yên din, daxwaza herî xwezayî ya biryarên DMME, Destûra Bingehîn, hiqûqa demokratîk û pîvanên siyasî ye. Berovajî gotinên di nivîsê de tê îdîakirin, Birêz Ocalan jî gelek caran behsa girîngiya van pêwîstiyan kir.
Weke Şanda Îmraliyê ya DEM Partiyê, em bang li kesên ku ev helwesta bi zanebûn nîşan didin dikin ku dev ji spekulasyonê berdin û ji bo aştiya welêt û berjewendiya gel bixebitin.”
