Hat diyarkirin ku tevî zêdeyî 6 meh li ser plana aştiyê ya Xezeyê ya li Neteweyên Yekbûyî (NY) hatî qebûlkirin derbas bûne jî, krîza mirovî ya li herêmê didome. Oxfam, Save the Children û Refugees International ragihand ku rewşa li Xezeyê hîna ‘di asta karesatê de ye’.
Nûnerên saziyan ên ku di civîna çapemeniyê ya li navenda NY’ê ya li New Yorkê de axivîn, diyar kirin ku biryara Konseya Ewlehiyê ya NY’ê ya têkildarî plana agirbestê ya bi piştgiriya DYE’yê ku Mijdara 2025’an hatibû qebûlkirin, li sahê nayê bicihanîn.
Li gorî saziyên civakî yên sivîl, Îsraîl derbasbûna pêdiviyên esas ên ji bo şebekeyên avê, tenduristiyê û hwd hîn jî asteng dike.
Ji Serokatiya Oxfam-Emerîka Abby Maxman diyar kir ku kanalîzasyona vekirî û kêmahiya hîjyenê, xeteriya nexweşiya şewbê zêde dike.
Ji Save the Children Jantî Soeripto jî got, ji ber birçîtiyê hejmara zarokên ku akut malnutrîsyon pê re çêbûye, zêde bû. Di daxuyaniyê de hate destnîşankirin ku nêzî 600 hezar zarok sê sal in ji perwerdeyê bêpar dimînin.
Cerahê Emerîkî yê ji Xezeyê vegeriya Teresa Soldner jî anî ziman ku êrîşên Îsraîlê didomin û sîstema tenduristiyê bi temamî hilweşiya ye.
Saziyan bang li Dewletên Yekbûyî yên Emerîka (DYE) û civaka navneteweyî kir ku zextê li Îsraîlê bikin da ku berpirsyariyên xwe yên di çarçoveya peymana agirbestê de bi cih bîne.
Serokê Refugees International Jeremy Konyndyk got, “Beşa peymana agirbestê ya herî hêsan jî, nayê bicihanîn.”
