Li Goristana Girê Seywan ya bajarê Silêmaniyê bi beşdariya gelek welatparêz, çalakvan û rêxistinên jinan, Şehîd Viyan Soran di 20’emîn salavegera şehadeta xwe de hat bibîranîn.
Di çalakiya bîranînê de wêneyên Şehîd Viyan Soran hatin bilindkirin û dirûşmeyên azadiyê hatin berzkirin. Her wiha di çalakiyê de soza şopandina rêya Şehîd Vîyan û hemû şehîdên di ber azadiya gel, serokatiya xwe û welatê xwe de canê xwe feda kirine, hate dayîn.
Merasîma bîranînê di kesayeta Şehîd Viyan Soran de, ji bo hemû şehîdên Têkoşîna Azadiya Gelê Kurd bi deqeyek rêzgirtinê destpê kir.
Piştre çalakvan Rûnak Mecîd axivî; “Îro em şehîdekî ku 20 sal berê li dijî zilma li ser Rêber Ocalan derket û çalakiya fedayî kir, bibîr tînin. Wê bi agirê bedena xwe komploya navnetewî a li dijî Rêber Apo şewitand. Xeteriyên ku wê li dijî tevger, welat û gelê me hîs dikir hîn jî ji aliyê dijmin ve tên afirandin.”
Piştre daxuyaniya Înîsiyatîfa Jinên Başûr ji aliyê Jarîn Husên ve hate xwendin. Di daxuyaniyê de hate gotin ku gelê Kurd bi êrişeke dijwar re rûbirû ye ku piştî sedsalekê ew dixwazin peymanên kevin yên li dijî Kurdan nû bikin.
Di daxuyaniyê de hat gotin ku keç û xortên Kurd li Rojavayê Kurdistanê singê xwe kirine mertal û mîna Şehîd Viyan Soran ji bo parastina welat şer dikin.
Her wisa di daxuyaniyê de helwesta welatparêz a xelkê Başûr ku her tim li dijî komploya desthilatdaran rawestiyaye, hate silavkirin. Beşdaran soz dan ku heta azadiya Kurdistanê bidest bixin, ewê li ser rêya şehîdan têkoşîna azadiyê berdewam bikin û ala têkoşînê li dijî hemû dagirkeran bilind bikin.
