Şêniyên ku bi pêşengiya Platforma Saziyên Demokratîk de li Amed hatin gel hev, bi meşeke girseyî êrîşên komên girêdayî hikûmeta demkî ya Sûriyeyê li ser taxên Şêxmeqsûd û Eşrefiyê yên Helebê protesto kirin. Girseya ku li ber Abîdeya Mafên Mirovan a li Parka Koşûyolûyê kom bû, bi dirûşmeyan ber bi AZC Plaza ya li taxa Ofîsê ve meşiya, peyama hevgirtinê bi gelê Rojava re dan.
Şêniyên Amedê têkildarî êrîşên çeteyan ên li ser taxên Şêxmeqsûd û Eşrefiyê ji ANF’ê re axivîn.
‘EM VÊ HOVÎTIYÊ ŞERMEZAR DIKIN’
Mehmet Daniştekîn: Ji bo kesên li pişt van êrîşên çeteyî yên li ser Rojava eşkere bikin, em îro li kolanan e. Em êrîşa li ser gelê Rojava şermezar dikin. Em bang li her kesî dikin ku li kêleka gelê Rojava bisekinin. Em vê hovîtiya mezin a ku li Rojhilata Navîn li dijî gelê Kurdistanê tê kirin bi tundî şermezar dikin.
‘ROJAVA XETA ME YA SOR E’
Mazlûm Karakeçî: Berî her tiştî, pêwîst e ku armanca serek ya vê êrîşê were zanîn. Rojava wê pêvajoya aştiyê û çarenûsa Rojhilata Navîn diyar bike. Çawa ku Rêberê Gelê Kurd birêz Abdullah Ocalan Rojava wekî xeta xwe ya sor dît û wisa da naskirin, divê em jî vê yekê esas bigirin. Divê em xwedî li xeta me ya sor Rojava derkevin. Em ê li kêleka gelê Rojava bisekinin.
‘EM JI BO ROJAVA LI KOLANAN IN’
Rûkiye Bakiş: Em ji bo hevgirtina xwe ya bi gelê Rojava re nîşan bidin li kolanan e. Divê êdî kujerên xwînxwar destên xwe ji ser gelê Rojava rakin. Ger gelê Kurd bi rastî rabe ser piyan, ew ê wan di tifa xwe de bifetisînin. Bi hezaran jin li Rojava jiyaneke azad û wekhev ava kirine. Divê em xwedî lê derkevin. Em hovîtiya ku diqewime şermezar dikin. Ez bang li gelê Kurd û hêzên demokratîk dikim; em Rojava tenê nehêlin.
‘DIXWAZIN GELÊ ME QETIL BIKIN’
Azadîn Okan: Komên çekdar ên girêdayî hikûmeta demkî ya Sûriyeyê êrîşî gelê me yê li taxên Şêxmeqsûd û Eşrefiyê dikin. Ew dixwazin gelê me yê li wir dijîn qetil bikin. Wekî gelê Kurd em li kêleka wan in.Tiştê ku ji destê me tê em ê bikin. Em ê nehêlin ku gelê me di komkujiyê de bê derbaskirin. Em dibînin ku li Rojhilata Navîn sêwiraneke nû heye. Bandora sereke ya vê sêwiranê Kurdistaneke azad e. Em ji vir bang li hemû gel û dewletan dikin; gelê me yê li Rojava ku tê xwestin ku bên qetilkirin tenê nehêlin.
