Gelê Kurd ku pêvajoya aştî û civaka demokratîk ji nêz ve dişopîne, dixwaze ku qanûna li ser pêvajoyê êdî bikeve rojeva meclîsê û gav bêne avêtin ku pêvajo bi lez bimeşe. Şêniyên Amedê li ser mijarê axivîn û hişyarî dan AKP’ê ku pêvajoyê neke qurbanê planên xwe yên hilbijartinê.
‘AZADIYA FÎZÎKÎ YA BIRÊZ OCALAN DIVÊ PÊK WERE’
Sevcan Yaşar diyar kir ku her tiştên divê têkildarî pêvajoyê bêne gotin gelek caran hatin gotin û ev tespît kir: “Divê azadiya fîzîkî ya Birêz Ocalan pêk were û gel jî tevlî pêvajoyê bê kirin. Eger tê xwestin ku pêvajo bi pêş ve biçe, girîng e desthilatdariya AKP-MHP’ê gotinên xwe êdî bixe pratîkê. Gelê Kurd êdî bi siyaseta mijûlkirinê naxape.”
Sevcan Yaşar destnîşan kir ku serketina pêvajoyê ji bo jinan hemûyan girîng e, ji ber vê jî di serî de jin divê barê pêvajoyê hilgirin.
‘YÊN KU LI SER TÊNE AXAFTIN DIVÊ LI DESTÛRA BINGEHÎN BÊNE BICIHKIRIN’
Servet Pala jî işaret bi girîngiya pêvajoyê ji bo gelan kir. Pala anî ziman ku divê dewlet dest ji stratejiya xwe ya xapandina Kurdan berde û got, “Eger em hemû welatiyên vî welatî hingî mafê me hemûyan e ku di çarçoveya demokratîk de bi hev re jiyana xwe dewam bikin. Divê bicihanîna vê yekê bi eşkere di Destûra Bingehîn de bê bicihkirin. Mijarên ku alî li ser diaxivin eger nekevin nava Destûra Bingehîn, hingî baweriya kesî bi pêvajoyê namîne.”
Pala destnîşan kir ku weke Kurdên li Tirkiyeyê dimînin ew statuya zimanê Kurdî dixwazin û axaftina xwe bi vî rengî dewam kir, “Ev daxwaz ne tenê ji bo Kurdan e, mafê hemû gelan heye ku bi zimanê xwe yê dayikê perwerdeyê bibînin. Feraseta ‘bila her kes serî bitewîne’ rast nîne, divê bê terikandin. Gavên ku beriya niha ji bo çareseriya pirsgirêka Kurd hatin avêtin qanûnî nebûn, lewma Kurd hatin xapandin. Axaftinên li Dolmabahçe û Osloyê hatin kirin, piştre hatin înkarkirin. Kurd wê nekevin heman şaşitiyê.”
Pala diyar kir ku li Tirkiyeyê demokrasî nemaye û êrişên li ser CHP’ê rexne kir. Pala ragihand ku ji aliyê avêtina gavên têkildarî pêvajoyê derengmayinek heye û diyar kir ku ev yek jî dibe sedem ku baweriya bi pêvajoyê kêm bibe.
‘GAVÊN QANÛNÎ DIKARE BAWERIYÊ BI XWE RE BÎNE’
Mahmût Bayhan jî destnîşan kir ku eger pêvajo bi ser bikeve hemû beşên civakê wê sûdê ji vê bibîne. Bayhan diyar kir ku ji ber gavên qanûnî nayên avêtin atmosfera baweriyê kêm dibe.
