Bi wesîleya salvegera 27’emîn a komploya navneteweyî ku di 15’ê Sibata 1999’an de li hemberî Rêber Apo hate kirin li çar aliyên cîhanê çalakiyên şermezarkirinê hatin lidarxistin. Daxwaza ku di çalakiyên şermezarkirinê de derkete pêş azadiya fîzîkî ya Rêber Apo bû.
Şêniyên Amedê yên tevlî meşa şermezarkirinê bûn ji ANF’ê re axivîn.
‘YÊN KU DIXWAZIN BI KURDAN RE LI HEV BIKIN DIVÊ AZADIYA FÎZÎKÎ YA BIRÊZ OCALAN PÊK BÎNIN’
Mecît Tûrgay: Komploya navneteweyî tekez negihîşt armanca xwe. Birêz Ocalan dîl hate girtin lê belê dijî. Em Birêz Ocalan ji we re nahêlin. Yên ku dixwazin bi Kurdan re li hev bikin divê destpêkê Birêz Ocalan azad bikin. Lîder hene ku dibêjin ew deyndarê Kurdan e, wê demê bila qanûnên ku Kurdan diparêzin derxin. Ji niha û pê ve Kurd têk naçin, Kurdên ku ji aliyê Birêz Ocalan ve hatiye birêxistinkirin têk naçin. Xeta me ya sor hem Rojava ye hem jî Birêz Ocalan e. Ez 15’ê Sibatê û 6’ê Çileyê şermezar dikim. Bijî têkoşîna azadiyê ya gelê Kurd, bijî Birêz Ocalan. Gelê Kurd ji bo aştiyê berpirsyariya xwe bi cih anî. Divê dewlet êdî berpirsyariyên xwe bi cih bîne.
‘AZADIYA RÊBER APO GELEKÎ GIRÎNG E’
Norşîn Ak: Çawa ku êrişên li ser Rojava negihîşt armanca xwe, komploya navneteweyî jî negihîşt armanca xwe. Li çar aliyên Kurdistanê û cîhanê ruhê berxwedanê ev êrîş pûç kir. Komploya navneteweyî ti carî negihîşt armanca xwe. Heta ku Rêberê Gelê Kurd Birêz Abdullah Ocalan azad bibe em ê li qadan bin. Azadiya fîzîkî ya Rêber Apo gelekî girîng e.
‘RÊBER APO YEKÎTIYA ME PÊK ANÎ’
Delak Aktaş: Ez komploya 15’ê Sibatê şermezar dikim. Armanca vê komployê tinekirina gelê Kurd bû. Lê belê ew bi hezaran komployan çêbikin jî wê nikaribin gelê Kurd biqedînin. Rêber Apo yekîtiya me pêk anî. Gelê Kurd her roj hîn bêhtir dibe yek. Çawa ku di 6’ê Çileyê de komploya li ser gelê Kurd ê li Rojava hate têkbirin, wê komplo hemû bê têkbirin. Gelê Kurd wê timî li ser piyan be û li ber xwe bide. Ji vê derê bi hezaran silavî ji Rêber Apo re dişînim.
‘BI SAYA TÊKOŞÎNA AZADIYÊ YA KURDAN KOMPLO HATE TÊKBIRIN’
Mehmet Asana: Divê ev yek bi eşkere bê gotin; ne komploya destpêkê ne jî komploya ku niha tê meşandin negihîşt armanca xwe. Gelê Kurd û Rêberê wan rê nedan vê. Bi saya têkoşîna Tevgera Azadiyê ya Kurd yekîtî pêk hat û komplo hemû hatin têkbirin.
