Êrîşên Îsraîl û Îranê yên li hemberî hev dewam dikin. Fermandariya Eniya Navxweyî ya artêşa Îsraîlê diyar kir ku di êrîşên Îranê de 24 kes mirin. Hate ragihandin ku di êrîşên bersivdanê yên Îranê yên bi şev de li Îsraîlê 8 kes mirin.
Hêzên Parastinê yên Îsraîlêw (IDF) diyar kir ku di şerê 4 rojan de zêdeyî 120 qadên fuzeyan ên Îranê hatin îmhakirin, ku ev hejmar yek ji 3 parên navendên fuzeyan ên Îranê ye.
Ofîsa Serokwezaretiyê ya Îsraîlê ragihand ku ji 13’ê Hezîranê û vir ve Îranê di bersivdayinê de 370 fuzeyên balîstîk avêtine û li 30 nuqteyan ketine.
Baskê artêşê yê Ensar el Mehdî yê Artêşa Muxafizên Şoreşê ya Îranê (IRGC) diyar kir ku li eyaleta Zencanê di êrîşeke Îsraîlê de fermandarek û leşkerek mirine. Ajansa Nûçeyan a Tasnîmê ragihand ku kesên mirine fermandarê IRGC ê herêma Îcrûdê Reza Najafî û leşker Hassan Rasoûlî ne.
Berdevkê Wezareta Karên Derve ya Îranê Îsmaîl Bekayî li avahiya Wezareta Karên Derve ya li Tehranê civîna çapemeniyê lidar xist. Bekayî got, “Dema ku em li êrîşkariya rejîma Siyonîst rast hatin, em di navenda pêvajoyeke dîplomatîk û danûstandinan de bûn. Weke ku min beriya niha jî gotibû, bêyî koordînasyon, hevkarî û piştgiriya DYE’yê rejîma Siyonîst nekarî vê çalakiyê bike. Lewma vê çalakiyê pêvajoya dîplomatîk û danûstandinan bê wate kiriye.”
Berdevkê Wezareta Karên Derve ya Îranê Îsmaîl Bekayî anî ziman ku Parlamenta Îranê amadekariyê dike ku ji bo vekişîna ji Peymana Pêşîgirtina li Belavbûna Çekên Nukleerî pêşnûme qanûnekê amade bike.
Komîserê Bilind ê Mafên Mirovan ê Neteweyên Yekbûyî (NY) Volker Turk ji bo bidawîkirina êrîşên navbera Îsraîl û Îranê û peydakirina rêyeke çareseriyê banga danûstandinên bi lez ên dîplomatîk kir.
Civîna awarte ya Desteya Rêveberiyê ya Ajansa Enerjiya Atomê ya Navneteweyî, ji bo nirxandina êrîşên Îsraîlê yên li ser navendên nukleerê yên Îranê, bi beşdariya nûnerên 35 welatan li paytexta Awûstûrya Viyanayê li hev civiya.
Berdevkê Wezareta Karên Derve ya Çînê Guo Jiakun jî got, “Êrîşên Îsraîlê yên li ser Îranê bûn sedem ku rageşiya leşkerî ji nişka ve bilind bibe. Em ji ber vê rewşê bi fikar in. Em bang li aliyan hemûyan dikin ku ji bo kêmkirina rageşiya ji ber kaosa mezin a li herêmê, tavilê gavên şênber biavêjin. Eger şerê navbera Îsraîl û Îranê mezin bibe û dewam bike, ev yek wê bandoreke giran li welatên Rojhilata Navîn bike.”
