Cîgira Meclîsa Jinan a TEV-DEM’ê Şêrîn Hesen bi boneya nêzîkbûna 25’ê Mijdarê Roja Têkoşîna li Dijî Tundiya Ser Jinan ya Navneteweyî ji ANF re qala têgeha tundiyê kir. Şêrîn Hesen di destpêka axaftina xwe de anî ziman ku tundî, tê wateya kesên ku dixwazin li ser kesên li hemberê xwe koletîyê bide meşandin, xwe li ser her tiştî ferz bike û li ser kedên mirovanan xwe mezin bike û got: ‘’Sê cureyên tundiyê hene. Ji têgehan zêdetir, cureyên tundiyê hene; tundiya madî, lêdan, kuştin û hwd.’’
Şêrîn Hesen di dewama axaftina xwe de diyar kir ku tundî ne tene li ser jinan tê meşandin û got: ‘’Tundî, li kêleka ku li ser jinan tê meşandin, ji aliyekî din ve li ser hemû civakê jî tê meşandin. Di şexsê jinan de civak jî bê îrade û bê hêz tê hiştin. Li kêleka van yekan tundiya li ser xwezayê jî heye. Mînaka wê jî kiryarên ku niha li Efrînê li ser xwezayê ne. Bi rêya êrîşan li ser şûnwar û xwezayê dixwazin bîra civakê têk bibin, siyaset û civakeke li gorî xwe ava bikin. Eger em birîna darên zeytûnan ji alîyê manewî vee bigirin dest, ev tê wateya qutkitina ji koka dîrokî, çandî, ziman û kevneşopiyê. Her wiha bi rêya guhertina demografik ku a niha li Efrînê jî ev yek tê kirin, dixwazin li ser hebûna gele resen guhertinekê bikin. Tundiya ku tê meşandin li ser civakê û xwezayê ye jî.’’
Şêrîn Hesen di dewama axaftina xwe de bal kişand li ser hedefgirtina jinan a di nava civakan de û wiha got: ‘’Dema ku mirov dixwaze civakekê nas bike, mirov wê li gorî rewşa jinan a di nava civakê de wê civakê nas bike. Her jinek asta pêşketina civaka xwe diyar dike. Civakên desthilatdar jî bi hezar salan e ji dema ku sîstema dayîksalarî hildiweşe û sîstema desthilatdariyê derdikeve holê heya niha dixwazin wê sîstemê li ser jinan bidin meşandin. Dema ku dixwazin civakeke kole ava bikin di destpêkê de destê xwe diavêjin jinên wê civakê. Jinan hem bi awayekî fîzîkî hem jî ji aliyê fikrî ve dikin kole. Dema ku mirov li dîrokê dinêre û lêkolîn dike, dibîne ku hemû caran asta jinan tê lawazkirin. Ji ber ku ji jinên xwedî fikir û rêxistinkirî ditirsin. Ji ber vê yekê di hemû pêvajoyan de bi her awayî siyaset ser jinan dane meşandin.‘’
Şêrîn Hesen diyar kir ku Şoreşa Rojava bi rengê jinan hatiye cudakirin û wiha domad: ‘’Şoreşa Rojava, di encama tekoşîna 28 şoreşên Kurdistanê de hate lidarxistin. Cudahîya wê ew e ku tecrûbe û kêmasiyên ku di şoreşên din de derketine pêş, di Şoreşa Rojava de hatine derbaskirin. Beşdarbûna jinan a ji bo vê şoreşê rengekî cuda da şoreşê û weke şoreşa jinan hate binavkirin.”
Cîgira Meclîsa Jinan a TEV-DEM’ê Şêrîn Hesen di dawiya axaftina xwe de tekez kir ku divê yekîtiya jinan û civakê misoger bibe û got: ‘’Divê hemû kesên ku di nava civakê de cih digirin, bizanibin ku eger tundiyek hebe ew li ser her kesî tê meşandin. Ji bo sekinandin û bidawîkirina wê jî divê yekbûna jinan him di asta Kurdistanê û him jî di asta cîhanî de tekez bibe. Da ku bikaribin bi hev re pergala xwe ava bikin û di şexsê jinan de civak giştî asta tekoşîna xwe bilindtir bike. Da ku bikaribin bi hev re jîyyaneke ekolîjîk, bi edalet û wekhev ava bikin.’’
