Rêber Apo bi taybetî li Kurdistanê ji bo jinan jiyaneke nû afirand. Nasnameya jineke azad, wêrek, bi bawerî û îradeyê pêşkêşî jinan hemûyan kir. Bi vê yekê re hem tola jinan hilanî hem jî dilsoziya xwe ya bi jinan re nîşanî tevahiya cîhanê da. Bi Sarayan re hevrêtî kir, bi Zîlanan re xeta azadiyê ya jinê diyar kir, bi Bêrîtanan re artêşbûna jinê YJA Star ava kir. Ji her netewe, ol û mezhebê bi hezaran jin li hev kom kir. Navê her lehengekê bû navê zarokeke nû ji dayik bûyî. Hêlîn Kobanê jî ku navê wê yê li nava malê Şemsa Adil Feyyad bû, da ser şopa lehengên Kurdistanê, pêşengî ji jinên Ereb re kir û navê xwe li dîroka berxwedanê ya Tevgera Azadiyê nivîsî.
Hevala Hêlîn Kobanê bi eslê xwe ji Minbicê, ji gelê Ereb e. Dema ku êrişên çeteyên DAÎŞ’ê yên li ser Rojava zêde bûn, malbata wê jî rastî êrişan hat û ji aliyê dijmin ve hate qetilkirin. Ciwanên Kurd ên ku li hemberî çeteyên DAÎŞ’ê berxweedaneke mezin nîşan dan, bala hevala Hêlîn kişand. Jinên ciwan ên ku bi çekê xak û welatê xwe diparastin, bandoreke xurt li Hêlîn Kobanê kirin. Serîtewandiya li dagirkeriyê, negihîstina dayikên dilşewat û zarokan li hestên hevala Hêlîn nedihat; nikarîbû vê yekê qebûl bike. Ji ber vê jî beşdarî nava perwerdeyên îdeolojîk û leşkerî bû. Li qada leşkerî xwe bi pêş ve bir, rahişt çekê û beşdarî operasyonên li dijî çeteyên DAÎŞ’ê bû. Her çeteyê ku ceza kir, serbilind bû. Vê serbilindiyê rêyeke nû, armanceke nû, jiyaneke nû danî pêşiya wê.
Bi rê ket, heyv jê re bû hevrê, gav bi gav ber bi jiyana gerîla ve meşiya. Her roja xwe bi lehengiya gerîla ya li hemberî çekên kîmyewî derbas kir, bi kenê gerîla kêfxweş bû, bi meşa wan ber bi jiyaneke bi rûmet ve meşiya. Têkoşîna gerîla ya li çiyayên Kurdistanê ji bo wê rêya jiyaneke nû vekir û li ser vê bingehê di sala 2023’an de tevlî nava refên gerîla bû. Dîtina çiyayên Kurdistanê kelecaneke mezin da Hêlîn. Bedewiya çiyê, av û rûbaran di dilê wê de bû weke bahozekê. Meşa li serê çiyê, gir û rêyên çiyê ji bo wê bû nîşaneya meşa azadiyê. Xwêdana ji eniya wê diherikî, westandin, bêxewî ji bo hevala Hêlîn bû biryardariya jiyaneke bi rûmet.
TÊKILIYÊN HEVRÊTIYÊ JI BO WÊ BÛ PÎVANEK
Li nava refên YJA Starê li ser xeta neteweya demokratîk têkoşiya ku Rêber Apo diyarî gelan kir. Hevala Hêlîn bedewiya cihêrengiyê dîtibû; ji ber vê jî di vî fikrî de xwe afirand û rêgeha jiyana xwe jî li ser vê bingehê ava kir. Berê hevala Hêlîn li heqîqetê bû. Têkiliyên hevrêtiyê ji bo wê pîvaneke welê bû ku nebe nabe. Hebûn û hişmendiya xwe bi hebûna hevrêtiyê bi wate dikir. Hevala Hêlîn di kenê her hevrêyên xwe de wateya jiyaneke nû didît, hevrêtî bi hezkirinê ji nû ve mezin dikir û bedew dikir. Her hevrêyên wê yên ku bi çekên kîmyewî şehîd diet, hesta wê ya hêr û tolhildanê ya li dijî dijmin mezin dikir. Berxwedana hevrêyên wê ji bo wê vediguherî dibistaneke têkoşînê. Qîrîna Baz, kenê Helbest ji wê re dibû xewn û xeyal.
Wê bi wan dîmenên hevrêyên xwe berpirsyariya hilanîna tolê di wijdanê xwe de dixist ber lêpirsînê. Bi gotina ‘Em dereng man, em çiqasî dereng bimînin dîrok wê hesab ji me bipirse’ barê şoreşê hildida ser milê xwe. Ji bo hevala Hêlîn jiyaneke hêsan ne jiyanek bû. Wê biryar da ku bide ser şopa hevrêyên xwe yên fedaî Sara û Rûken. Ji bo ji berxwedana li Rojavayê Zapê dûr nekeve pêşniyar kir ku biçe qada şer. Weke gerîlayeke YJA Starê Hêlîn Kobanê beşdarî berxwedana Zapê bû û bi pêngavên xwe dijmin matmayî hişt. Li gel ku dûrî hevrêyên xwe û dorpêçkirî bû bi hêrsa tolhildana bi salan a di dilê xwe de derbên giran li dijmin xist.
Vê şervana fedaî û wêrek şehadeta hevrêyên xwe bi bilindahiya jiyaneke nû pêşwazî kir, lê belê ti carî qebûl nekir ku dijmin dest dîne ser cenazeyên hevrêyên wê. Hevala Hêlîn dema ku dixwest cenazeyên hevrêyên xwe werbigire, li gel hevrêya xwe Lêgerîn Canfeda di 20’ê Mijdara 2024’an de tevlî karwanê şehîdan bû. Hêlîn Kobanê weke jineke berxwedêr her kêliya xwe bi têkoşînê derbas kir. Ji ber ku zanî bû ya esasî ew e ku bi milyonan ala azadiyê bilind bike; wê nehêlin ku ew al bê danîn, wê li ber xwe bidin û bi Rêberê xwe re bigihêjin jiyana azad.
