Hêzên Rizgariya Efrînê (HRE) bi daxuyaniyekê ragihand ku şervanê wan Hisên Mihemed Nasiro, bi nasnav Sîdar Efrîn, 17’ê Tebaxê dema li ser erka xwe bû, şehîd bûye. HRE’yê di daxuyaniya xwe de behsa têkoşîn û berxwedana şehîd Sîdar kir û soza şopandina hemû şehîdên azadiyê da.
Daxuyaniya HRE’yê ya der barê şehadeta Sîdar Efrîn de wiha ye:
“Em hevrêyê xwe Sîdar Efrîn, bi navê xwe yê rast Hisên Mihemed Nasiro ku di 17’ê Tebaxa 2025’an de dema ku li ser erka xwe bû gihaşt asta şehadetê, bi rêzdarî û hurmet bi bîr tînin. Hevrê Sîdar Efrîn di ciwantiya xwe de tevlî nava refên azadiya Rojavayê Kurdistanê bû û di temenê xwe yê ciwan de erk û mîsyonên girîng girtin ser milê xwe, heyanî gihîşt asta şehadetê bê sekin û tebat erka xwe ya şoreşgerî bi temamî pêk anî. Em ji gelê xwe yê welatparêz re û ji malbata hêja ya hevrê Sîdar re sersaxî dixwazin û soza xwe ya tolhildanê û dewam kirina rêya şehîdan nû dikin.
Hevrê Sîdar li bajarê Efrîna berxwedêr li gundê Mîrkan ê girêdayî navçeya Mabeta di sala 1999’an de ji dayik dibe, di nava malbeteke welatparêz de çavên xwe li dinyayê vedike. Ji biçûkaniya xwe ve bi çîrok û destanên qehremantiyê yên Kurdî mezin dibe, lewra Hevrê Sîdar bi Şoreşa Rojavayê Kurdistanê bandor dibe û di temenê xwe yê ciwantî de berê xwe dide nava refên rizgariya welêt û dest bi lêgerîna xwe ya azadiyê dike. Hevrê Sîdar di sala 2013’an de li Çiyayên Kurmênc ê bajarê Efrînê beşdarî têkoşîna azadiyê dibe, di akademiyên rêxistinî re derbas dibe û di warên bîrdozî, leşkerî, siyasî de perwerdeyan dibîne û xwe tê de kûr dike.
Di sala 2016’an di dema pêngava rizgariya herêma Şehbayê ji terora DAIŞ’ê de, hevrê Sîdar tevlî pêngava rizgariyê dibe û bi berpirsyariyek mezin erka xwe ya welatparêzî, şoreşgerî û insanî pêk tîne. Her wiha dibe şahidê terora DAIŞ’ê ku çawa gelê Şehba di qetlîaman û qirkirinê re derbas kirin. Hevrê Sîdar bi hevrêyên xwe re şerekî mirovî ji bo rizgarkirina gel ji zilm û zordariyê didin meşandin, kêliyên serkeftinê bi tîpên zêrîn dinivisînin, ken û kêfxweşiyê li ser rûyê zarok, dayik û bavan didin avakirin.
Hevrê Sîdar di berxwedana dîrokî ya Efrînê de wek şervanekî wefadarê axa xwe, çeka xwe spart hembêza xwe, mil bi mil li kêlekî zarokên welatê xwe şerê rûmetê li dijî mêtîngerî û dagirkeriyê yên ku dixwestin gel ji îradeyê tecrîd bikin, dîrok û çanda çiyayên Kurmênc tune bikin, lê bi berxwedana gel û şervanên mîna hevrê Sîdar û bi hezaran hevalên şehîd ew planên qirêj têk birin. Di her du qonaxên Berxwedana Serdemê de mîna mîlîtanekî dil ji pola li kêleka gel û hevrêyê xwe sekinî û xwe kir mînakek ji fedakarî û dilsoziya dozê re.
Hevrê Sîdar ji destpêka tevlîbûna xwe ve û heya gihîşt roja şehadetê, bi dilnizmî, welathezî û hevaltiya rast hate nasîn. Şoreşgertiyek bêhempa ji bo azadiya gelê xwe, welatê xwe, cih û warê bav û kalan meşand û navê xwe bi tîpên zêrîn û bi destê ku ji kedê westiyayî nivîsand.
Hevrê Sîdar mîna bi hezaran şehîdan e ku ji bo azadiya Rojavayê Kurdistanê canê xwe feda kirine. Di serî de ji malbata xwe ya hêja malbata hevrê Sîdar Efrîn û ji gelê me yê Efrînê û tevahiya gelê Kurdistana pîroz re em sersaxî dixwazin.
Wek hevrêyên wî em soz didin ku em ê tu car ji têkoşînê gav şûnde naavêjin. Xewn û xeyalên hevalên şehîd tu car di nîvî de namînin. Ji bo pêkanîna armancên wan bedelê wê çi be jî em ê bê teredûd û bêdudilî pêk bînin. Em ê bibin layiqê ked û fedakariya rêhevalên xwe û asta têkoşîna xwe li hemberî dagirkeriyê mezintir û bilindtir bikin.”
NASNAMEYA ŞEHÎD
Nasnav: Sîdar Efrîn
Nav û Paşnav: Hisên Mihemed Nasiro
Navê Dayikê: Zeyneb
Navê Bav: Mihemed
Cih û Dîroka Şehadetê: 17 Tebax 2025
