Şervanên QSD’ê bi ruhekî mezin Zindana Eqtan ji êrîşên çeteyên HTŞ- DAÎŞ’ê diparêzin, gotin: “Li vir tiştê ku tê kirin ji cihanê re bûye mînakek. Çavên cihanê giştî li vir e. Wê Zindana Eqtanê bibe serkeftina Kurdistanê.”
Çeteyên HTŞ’ê yên hikûmeta demkî ya Şamê bi piştgiriya dewleta Tirk a dagirker êrîşî Rojavayê Kurdistanê dikin. Çeteyên HTŞ’ê bi taybetî êrîşî zindanên ku çeteyên DAÎŞ’ê lê girtîne û hewl didin çeteyan rizgar bikin. Ji van zindanan yek jê Zindana Eqtanê ye. Şervanên QSD’ê yên ku Zindana Eqtanê diparêzin derbarê rewşa xwe de ji ANF’ê re dîmenek şandin.
Şervanê QSD’ê diyar kir ku ew bi ruh û berxwedaniyeke mezin zindanê ji êrîşên çeteyên HTŞ-DAÎŞ û dewleta Tirk a dagirker diparêz in û ev tişt anî ziman: “Wek heval giştî dizanin ev mewziyê me ye, em niha di mewziyê de ne. Ev bû 6 roj berxwedana Zindana Eqtanê tê kirin. Bi giştî 10 roj e, seranserê xeta eniyê berxwedanek tê kirin. Dibe ku gelê me, hevalên me, welatparêz û malbatên me difikirin ku em li vir di bin dopêçê de rewşa me nebaş be. Bila wisa nefikirin, bila bizanibin dil û ruhê me gel wan e. Îrade û biryardarî di asta herî jor de ye. Yanê bizanibin, li vir tiştê ku tê kirin ji cihanê re bûye mînakek. Çavên cihanê giştî li vir e. Moralê me pir xurt e. Ji vir şûnde Zindana Eqtanê, gav paş de avêtin wê tu carî çênebe. Wê Zindana Eqtanê bibe serkeftina Kurdistanê. Wê bibe yekitiya her çar perçeyên Kurdistanê.”
