Endamê Buroya Siyasî ya Partiya Zehmetkêşên Kurdistanê Şivan Muhemmed, di hevpeyvînek xwe ya digel servîsa Soranî ya ANF’ê de, li ser girîngiya Pêvajoya Aştî û Civaka Demokratîk, nêzîkatiya hesas a Rêber Apo, bandora şerê li herêmê ya li ser Kurdan û rewşa yekîtiya partiyên siyasî yên li Rojhilatê Kurdistanê nirxandin kir.
‘TIŞTÊ KU BI AŞTIYÊ TÊ BIDESTXISTIN JI YA KU BI ŞER TÊ BIDESTXISTIN PIR MEZINTIR E’
Muhemmed, behsa girîngiya Pêvajoya Aştî û Civaka Demokratîk kir, bal kişand ser peyamên Rêber Apo û diyar kir ku divê Tirkiye pêvajoyê ne bi gotinan, bi gavên qanûnî pêşve bibe. Muhemmed, destnîşan kir ku Tirkiyeyê hîn bi giştî gavên pêwîst neavêtine û got ku pêvajoya aştiyê îradeya gelê Kurd ji bo aştiyê nîşan dide. Muhemmed, diyar kir ku Kurdan çek wekî çareya dawî ji bo bidestxistina mafên xwe bi kar anîne û gavên girîng avêtine.
Şivan Muhemmed, anî ziman ku gavên ku Tevgera Azadiya Kurd piştî peyamên Rêber Apo avêtine, xwesteka Kurdan ji bo bidestxistina mafên xwe li Bakurê Kurdistanê bi rêbazên aştiyane nîşan dide. Muhemmed got, “Tiştê ku bi aştiyê tê bidestxistin ji ya ku bi şer tê bidestxistin pir mezintir e,” û hêviya xwe ji bo destpêkirina pêvajoyek nû ji bo guhertinên destûrî li Tirkiyeyê anî ziman.
‘HÊZÊN KURD GER BIBIN YEK DÊ BI SERBIKEVIN’
Muhemmed, behsa girîngiya yekîtiya neteweyî ya Kurdan kir û diyar kir ku dijminên Kurdan her tim komplo plan dikin û got ku rewşa li Rojava mînakek vê yekê ye. Muhemmed, destnîşan kir ku dewleta Tirk û komên pê ve girêdayî hewl didin destketiyên Kurdan ji holê rakin, lê ev plan bi saya berxwedana Kurdan hatine têkbirin.
Şivan Muhemmed, anî ziman ku li Rojava, Kurd di çarçoveya peymanên bi hikûmeta Şamê re xwedî pergala rêveberiya xweser in û hêzên siyasî yên li Rojhilatê Kurdistanê bi yekîtî tevdigerin. Muhemmed, ji bo vê pêvajoya hesas bal kişand ser girîngiya yekîtiya di navbera partiyên li Rojhilatê Kurdistanê de. Muhemmed, got ku zext û polîtîkayên şer ên ku ji hêla DYE û Îsraîlê ve li dijî Îranê têne meşandin, nîqaşên li ser guhertina rejîmê li Îranê anîne rojevê û got ku ji ber vê yekê, divê partiyên li Rojhilatê Kurdistanê plan û projeyek hevpar pêş bixin.
‘PEYAMÊN ABDULLAH OCALAN DI VÊ PÊVAJOYÊ DE GELEK GIRÎNG IN’
Muhemmed, destnîşan kir ku peyamên Rêber Apo di rêvebirina pêvajoyê de pir girîng in û got ku divê her peyamek Rêber Apo bi baldarî were nirxandin. Şivan Muhemmed, bal kişand ser siberoja Rojhilatê Kurdistanê û Îranê ku di vê pêvajoyê de tê nîqaşkirin û behsa girîngiya projeya hevpar a Kurdan kir.
Muhemmed, diyar kir ku serkirdeyê siyasî ya Rojhilatê Kurdistanê hem di şerê 12 rojan de û hem jî di pevçûnên heyî de bi aqilmendî tevgeriya û got ku divê serkirdeyê Kurd rasterast nekeve nav şer. Her wiha got ku divê ji pasîfbûnê dûr bisekinin û pêvajo bi dîplomasî û rêbazên siyasî were rêvebirin.
‘XETERA HERÎ MEZIN JI BO BAŞÛRÊ KURISTANÊ YE’
Muhemmed, da xuyakirin ku xetera herî mezin li Başûrê Kurdistanê nebûna planeke siyasî ye. Şivan Muhemmed, anî ziman ku tevî demek dirêj di ser hilbijartinan re derbas bûye jî, hêzên desthilatdariyê nikarin bi hev re tevbigerin û ev yek ji bo siberoja siyasî ya Herêma Kurdistanê xetereyek cidî çêdike.
‘DIVÊ LI GORÎ GUHERÎNÊ GAV BÊN AVÊTIN’
Muhammed, diyar kir ku şerê li herêmê bûye sedema veguherînên siyasî yên mezin û destnîşan kir ku divê serokatiya siyasî ya Kurd li gorî guhertinên li her çar parçeyên Kurdistanê tevbigere an wê gelê Kurd ji vê pêvajoyê zirarê bibîne.
