Sîwana Meclîsên Jinên Êzidî (SMJÊ) kongreya xwe ya 6’êmîn li bajarê Bielefeld ê Elmanyayê bi dirûşma “Aştî û Civaka Demokratîk bi pêşengiya jinên Êzidî dibe” lidar xist. Kongreya ku 16’ê Mijdarê pêk hat, diyarî salvegera 10’emîn a rizgarkirina Şengalê hate kirin.
‘EM Ê KOMUN Û MECLÎSÊN NÛ AVA BIKIN’
Hevseroka Navenda Komeleyên Êzidî yên li Elmanyayê (NAV-YEK) û Berdevka SMJÊ Sosin Kartal kongre nirxand û anî ziman ku Banga Aştî û Civaka Demokratîk a ku Rêber Apo di 27’ê Sibatê de kir li kongreyê bi berfirehî hate nirxandin. Sosin Kartal got, “Em xwe weke parçeyekî vê pêvajoyê dibînin. Ji ber salvegera Rizgarkirina Şengalê me kongreya xwe diyarî cangoriyên Şengalê kir. Em li pişt Rêberê xwe ne, li ser şopa şehîdên xwe ne. Heta ku em hebin em ê xwedî li Rêber û şehîdên xwe dekrevin. Di kongreya me ya beriya niha de 29 endamên me hebûn, niha bûye 36 endamên meclîsê. Qada me ya kar berfireh bû; Em ê komun û meclîsên nû ava bikin. Em ê karên xwe hîn berfireh bikin.”
Sosin Kartal her wiha bi bîr xist ku li pêş çavên cîhanê êrişên giran li jinên li Şengalê hatin kirin û got, “Bi hezaran çîrokên veşartî yên dayikên me hene. Bi hezaran jinên Êzidî yên winda hene. Ji ber vê yekê jî em ê li Başûrê Kurdistanê tifaqan ava bikin û li rê û rêbazên karê hevpar bigerin. Em vê yekê ji bo bawerî, çand, nirxên xwe yên civakî û Rêberê xwe dikin.”
‘EM Ê JI DIYARIYA RÊBER APO, RÊXISTINÎ Û RONAKBÎRIYÊ RE BIBIN BERSIV’
Siyasetmedar Feleknas Ûca jî bal kişand ser wateya pênûsa ku Rêber Apo diyarî civaka Êzidî kiriye û got, “Piştî fermana 2014’an SMJÊ xwe bi rêxistin kir. Li hemberî vê fermanê li Ewropayê rêxistiniya jinên Êzidî ava bû. Di kongreyê de me girîngiya rêxistiniya jinên Êzidî nîqaş kir. Em civakeke welê ne ku 74 ferman li me rabûne. Ji ber vê yekê jî rêxistiniya daîmî ya civaka Êzidî ji bo bersivdana li fermanê gelekî girîng bû. Lewma pêvajoya ku Rêber Apo da destpêkirin em weke Sîwana Meclîsên Jinên Êzidî ji aliyê nûbûnê ve ji xwe re weke peyamekê dibînin. Ji ber ku Rêber Apo di peyam û nameyên xwe de girîngiya berxwedana jinên Êzidî nirxand. Û herî dawî pênûsek diyarî civaka Êzidî kir. Em ê bi vî rengî jê re bibin bersiv. Rêber Apo dibêje, ‘Vê berxwedanê, vê têkoşînê binivîsînin. Hûn destanan dinivîsînin, hûn vê pêvajoyê dinivîsînin’. Ev pênûs wê ji bo civaka Êzidî bibe rêxistinî û ronîbûnê. Weke civaka Êzidî em xwe di nava Banga Aştî û Civaka Demokratîk a Rêber Apo de dibînin. Em pêşengiyê ji bicihanîna vê bangê re dikin.”
