Li qada navneteweyî piştgigriya ji bo pêvajoya ‘Aştî û Civaka Demokratîk’ dewam dike, ku Rêber Apo pêşengiyê jê re dike. Konseya Federal a Swîsreyê ku beriya niha ragihandibû ku eger herdu alî bixwaze ew dikare bi rola navbeynkariyê rabe, di bersiva li pêşnûmeyeke nû de jî heman helwesta xwe dubare kir.
Wekîlê Parlamenta Federal û Endamê Komîsyona Têkiliyên Derve Nicolas Walder beriya çend rojan bi sernavê “Li Tirkiyeyê pêvajoya aştiyê ya bi PKK’ê re: Piştgiriya Swîsreyê çi ye?” pêşnûme pirsek pêşkêşî parlamentê kir û ji Konseya Federal xwest, ku bersivê bide. Konseya Federal (Hikumet) bersiv da pêşnûme pirsê.
EM AMADE NE KU BIBIN NAVBEYNKAR
Konseya Federal diyar kir ku pêvajo ji bo wan cihê kêfxweşiyê ye û got, “Konseya Federal pêvajoya aştiyê ya heyî ya li Tirkiyeyê bi kêfxweşî pêşwazî dike û eger ji aliyê hemû aliyan ve bê xwestin û bi vî rengî karibe piştgirî jê re bê kirin, amade ye ku xizmeta navbeynkariyê bike.”
BILA BIRYARÊN DMME’YÊ BI CIH BÊNE ANÎN
Ji bo pirsa li ser tecrîdkirina Rêber Apo û mijara azadiya wî jî Konseya Federal destnîşan kir ku dewleta Tirk divê biryarên Dadgeha Mafên Mirovan a Ewropayê (DMME) ên li ser doza Rêber Apo bi cih bîne. Konseya Federal got, “Têkildarî şert û mercên ragirtinê yên Abdullah Ocalan Swîsre piştgiriyê dide biryarên Dadgeha Mafên Mirovan a Ewropayê û pêşniyarên Komîteya Pêşîgirtina li Êşkenceyê ya Konseya Ewropayê (CPT). Swîsre bi rêk û pêk bang li Tirkiyeyê dike ku di mijara berpirsyariyên xwe yên mafên mirovan û pîvanên dewleta hiqûqê de bi rêzdarî tevbigere; vê yekê hem di têkiliyên dualî hem jî li platformên piralî dike.”
Swîsre di danûstandinên aştiyê yên piştî pêvajoyên şer de bi rola xwe ya navbeynkarî û çavdêriya aliyan tê naskirin.
