Dadgeha Bilind a di bin kontrola Talîbanê de diyar kir ku înfaz di çarçoveya ‘’qesasê’’ (mafê tolhilanînê) de û piştî redkirina efûyê ya ji aliyê malbata qurbanî ve hatiye kirin. Kesekî ku ji ber kujeriyê dihat mehkûmkirin, li stadyûmekê li ber çavan hate kuştin.
Di serî de Amu Tv’ya ku li sirgûnê weşanê dike û gelek saziyên çapemeniyên cuda ragihandin ku rayedarên Talîbanê di dema merasîma li stadyûmê de zarokê 13 salî yê ji malbata mexdûr vexwendiye ser dikê.
Rayedaran ji zarokê 13 salî re vebijarkên ‘’efûkirin û tolhilanînê’’ pêşkêş kirine. Hate ragihandin ku dema ku zarokî vebijarka efûkirinê red kiriye, rayedaran jî çekek daye destê zarokê berbehs û zarokî sê gule berdane û mehkûm kuştiye.
Ev îdîa, ji ber ku Talîbanê li qadên înfazê bi temamî bikaranîna telefon û kamerayê qedexe kiriye, bi awayekî serbixwe nehatin piştraskirin.
Li gorî şahidan, li stadyûmê nêzîkî 80 hezar kes hebûne.
Ofîsa çapeniyê ya Hostê ya Talîbanê, diyar kir ku kesê hatiye înfazkirin di meha Çileyê de li herêma Alişer bes ji malbatekê sê jê jin bi giştî 10 kuştine û ji ber vê yekê dihat mehkûmkirin. Hate destnîşankirin ku piştî dosyeya dozê ji sê merciyên darazê derbas bûye ji aliyê serokê Talîbanê Hibetullah Ahundzade ve hatiye erêkirin.
Li du gumanbarên bûyerê jî cezayê înfazkirinê hatiye birîn lê belê ji ber ku beşeke ji malbatên mexdûr derveyî welêt in, înfaz hatine taloqkirin.
Raportorê Mafê Mirovan ê Neteweyên Yekbûyî yê Efxanistanê Richard Bennett, beriya înfazê banga sekinandina cezayî kiriye û diyar kiriye ku înfazên li ber çavan ‘’li dijî hiqûqa navneteweyî û zalimane û dermirovî ne.’’
Richard Bennett, piştî nûçeyên têkildarî înfaza berbehs ku ji aliyê zarokekî 13 salî ve hatiye kirin, dubare diyar kir ku ev yek ‘’binpêkirineke giran a li dijî rûmeta mirovahiyê ye.’’
Talîban, ji Tebaxa 2021’an ve ye ku wê demê desthilatdariya Efxanistanê bi dest xist, dubare cezayên weke qamçîkirin, ricimandin û darvekirinê bi awayekî eşkere li pêşiya raya giştî dibire û wan pêk tîne. Ji wê rojê heya niha herî kêm 11 kes bi awayekî eşkere hatine darvekirin; çar ji van meha Nîsanê di heman rojê de hatibûn darvekirin.
