Alîkarê Hevserokê Giştî yê DEM Partiyê Tayîp Temel, di bernameyeke ku li Medya Haber TV’yê beşdar bû de, têkildarî pêvajoya Aştî û Civaka Demokratîk nirxandin kirin.
Temel diyar kir ku qonaxa yekemîn a pêvajoyê bi gavên ku “Rêber Apo û Tevgera Kurd” avêtine temam bûye û wisa got: “Heke ev pêvajo baş bihata nirxandin, qonaxa ku niha lê hatî gelekî pêşdetir dibû. Lê belê hem desthilatdarî, hem dewlet û hem jî muxalefet, li gorî tempo û leza Rêbertiya Ocalan û gavên dîrokî yên Tevgera Azadiyê nekarîn xebatê bimeşînin. komîsyona parlamenê jî dikaribû xebateke bandortir, bileztir û encamgirtir bimeşanda. Karakterê qonaxa yekem hinekî wisa bû; gavên niyetpakiyê yên yekalî û serkeftina Rêber Ocalan a di kişandina raya giştî ya Tirkiye, Kurdistan û cîhanê de ber bi perspektîfa çareseriyê ve bû. Niha qonaxa duyemîn armanc dike ku ji wê ruh halê 45 salên şer derkeve û derbasî pêvajoyeke aştiyê ya pozîtif bibe.”
‘PÊVAJO DIDOME VEGER JI VÊ NÎN E’
Tayîp Temel destnîşan kir ku dînamîka bingehîn a qonaxa duyemîn sererastkirinên zagonî ne û wisa axivî: “Pêdivî heye ku di warê zagonî de gav bi lez werin avêtin. Divê zagonên wekî Zagona Veguhastinê, Zagona Aşitiyê, Zagona Azadiyê û Entegrasyona Demokratîk werin derxistin da ku rêya aştiyeke mayînde vebe. Mebesta me ji qonaxa duyemîn ev e. Erê, vîneke pozîtîf heye lê em nêzîkatiyeke giran di warê civakîkirina vê de dibînin. Divê her kes bizanibe ku ev pêvajo berdewam dike û vegera wê nîn e. Ji bo aştiya navxweyî û herêmî, divê rîsk werin girtin û gavên pêwîst werin avêtin.”
‘QONAXA DUYEMÎN AVÊTINA GAVÊN ESASÎ DIXWAZE’
Temel bal kişand ser rîskên pêvajoyê û got: “Sîstematîka darbeyê û hêzên derveyî norman di dewrê de ne. Heta ku gavên esasî neyên avêtin, ev navendên li dijî çareseriyê wê hewl bidin saboteyan bikin. Rêya astengkirina provokasyonan û sîstematîka darbeyê ew e ku bêyî pêvajo were dirêjkirin, gavên esasî werin avêtin. Qonaxa duyemîn vê yekê ferz dike.”
‘MHP’Ê DI RAPORA XWE DE PERSPEKTÎFA ÇARESERİYÊ DİYAR NEKIRİYE’
Tayîp Temel raporên ku partiyên siyasî pêşkêşî Komîsyona Parlamenê kirine jî nirxand: “Ji derveyî rapora MHP’ê, di raporên komên din de tespîtên girîng hene. Tevî ku Bahçelî bang kiribû jî, rapora MHP’ê ne li gorî wê vîna çareseriyê ye. MHP’ê ji kodên fermî yên dewletê û karakterê yekparêz wêdetir nêzîkatiyek nîşan nedaye. Em vê wekî rîskekê dibînin.”
RAPORA CHP’Ê: ‘BÊSIÛDİYEK MEZIN E’
Temel diyar kir ku rapora CHP’ê tevî ku dereng maye jî, hêviyan bi cih neaniye: “Di rapora CHP’ê de navê Ocalan û navê pêvajoya ‘Aştî û Civaka Demokratîk’ carekê jî derbas nabe. Ev rewşek balkêş e. Di raporê de behsa gavên dîrokî yên PKK’ê û kongreya wê ya 12’an nehatiye kirin. Pirsgirêka Kurd ji navê ‘Kurd’ dûr girtine û zêdetir behsa sererastkirinên şaredariyan û zagonên îhaleyan kirine. Heke nêzîkatiya partiya muxalefetê ya sereke ev be, ev bêsiûdiyeke mezin e.”
‘RAPORA AKP’Ê DIVÊ LI GORÎ CIDİYETA DESTHILATDARİYÊ DE BE’
Temel bang li AKP’ê kir ku raporên xwe hîn pêşkêş nekiriye: “Heke rapora AKP’ê mîna ya ku di çapemeniyê de tê gotin be, heyf û mixabin… Ji nêzîkatiyek wisa aştî dernakeve. Divê rapora AKP’ê li gorî cidiyeta dewletê û berpirsyariya pêvajoyê be.”
