Konferansa, “Jin bi hev re qala pêşerojê dikin” ku li ser banga 80 jinên di nav de rojnameger, nivîskar, aktivîst, akademisyen û siyasetmedar hene li eywana Endezyarên Înşaatê ya navçeya Çankaya ya Enqereyê tê li darxistin bi rûniştina 2’yan a forumê ve berdewam dike. Rûniştina 2’yan a forumê bi sernavê “Em li dijî kapîtalîzmê û kedxwariyê li ser têkoşîna kedê diaxivin” destpê kir.
Hevseroka Giştî ya KESK’ê Ayfer Koçak bi lêv kir ku DEM Partî yek jî rêxistina mezin a kedê ye û wiha got: “Pêvajoya Aştî û Civaka Demokratîk ji bilî pêkanîna mafê kedê nabe. Em dikarin tevî cudahiyên xwe jî werin cem hev û hev fêm bikin. Heke em ê Civaka Demokratîk pêk bînin dema em çûn nexweşxaneyê divê mafê nexweşan ber bi çav bigirin. Dema çûn cihekî kar mafê xebatkaran ber bi çav bigirin.”
Aktivîsta TJA’yê Sebahat Tuncel jî diyar kir ku li dijî derketina kapîtalîzmê têr nake divê kapîtalîzm bi tevahî ji holê be rakirin û got: “Heke kapîtalîzm ji holê rabe kedxwarî jî dê ji holê rabe. Ji bo wê divê em li ser dê çawa vê pergalê ji holê rakin rawestin. Marks dibêje karker bi qasî dikare keda xwe bifroşê azad e. Niha ew yek jî guheriye. Bi Sosyalîzma Demokratîk em dikarin azadiya kedê jî pêk bînin. Werin em vê pergalê biguherînin. Dema me ew pergal guherand em ê çi bikin şûna wê; Em ê Sosyalîzma Demokratîk bixin şûna wê.”
Emîne Tegîn a ku bi axaftina xwe ya di civîna gel a li Sêrtê kiribû tê nasîn, ev tişt anî ziman: “Çima keçên me yên ciwan û jinên me tên qetilkirin? Çima em nikarin zarokên xwe bişînin zanîngehê? Çima Rojîn Kabaîş, Gulistan Doku û Îpek Er hatin qetilkirin. Em jin bersiva van pirsan dixwazin. Em jiyaneke dadwer, wekhev û rûmet dixwazin.”
Rûniştina dawî ya konferansê wê bi sernavê “Em li ser têkoşîna azadiyê û wekheviya zayendî diaxivin” berdewam bike.
