Temellî ji Ajansa Mezopotamyayê bi Mehmet Aslan û Selam Guleryuz re axivî û diyar kir ku pêvajoya ku bi Banga Aştî û Civaka Demokratîk a Rêber Apo re hatiye destpêkirin, bi komîsyona ku li Meclîsê hatiye avakirin re derbasî qonaxeke nû bûye.
Temellî, da zanîn ku Rêber Apo her tim bi rêbazeke dîrokî nêzî meseleyan bû û wiha got: “Ji ber vê yekê, îşaret bi vê komîsyonê kir û roleke dîrokî li vê komîsyonê bar kir. 28 îsyanên hêj di bîra me de ne. Di dîrokê de Ji Kongreya Erziromê heta Meclîsa Yekemîn a sala 191’ê û Destûra Bingehîn a 1922’yan, hemû geşedanên dîrokî li ber çavan digire, dinirxîne. Dema balê dikişîne ser rola komîsyonê bi siyaseta roja îro ve sînordar nake, li gorî dîrokê di rastiya xwe de ji bo pirsgirêka Kurd bi rêbazên demokratîk çareser bibe dixwaze gav bên avêtin.”
Temellî, anî ziman ku tevlibûna partiyan ya komîsyonê girîng e û wiha got: “Destpêkirina komîsyonê girîng e. Li gorî me bi qanûnê avakira komîsyonê dê baştir be. Lê wisa bawer dikim ku di dawiya dawî de dê sererastkirina qanûnî çêbibe.” Temellî got ku dê meclîs di meha Cotmehê de pêşniyarên komîsyonê qanûnî bike.
Temellî, diyar kir ku pirsgirêka Kurd pirsgirêkek tevlihev e, lê Rêber Apo ji bo çareseriya pirsgirêka Kurd nexşerê amade kiriye û divê komîsyon ewilî biçe serdana Rêber Apo û wî guhdar bikin. Temellî wiha axivî: “Birêz Ocalan sermuzakerevan e. Ger komîsyon neçe serdana sermuzakerevan gelo dê çiqas di cih de be? Ji ber vê yekê divê komîsyon bi sermuzakerevan birêz Ocalan re hevdîtinan bike.”
Temellî, bilêv kir ku divê bi Tevgera Azadiyê re diyalog bi pêş bikeve û wiha got: “Em behsa rêxistineke ku bi salan e di vê pêvajoyê de cih digire dikin. Ji ber vê yekê divê rastiya rêxistinê gelekî baş were fêhmkirin. Li pêşberî we rêxistinbûyîneke gelekî mezin heye. Ev nêzî 47 sal in têkoşînê didomîne. Serdemeke şer hatiye jiyîn. Niha hûn ji vî şerî derdikevin. Ji ber vê yekê, di hişê mirovan de hesabê van 47 salên dawî, rastiyên wê, her wiha nediyariyên li ser tiştên piştî derketina wê hene. Divê hûn bersivan bidin van hemûyan.”
Temellî, da zanîn ku pêwîst e civakê jî tevlî pêvajoyê bikin û wiha got: “Divê rêyên diyalog û îstîşareyan bi civakê re hevkariyê bike û ev hevkarî girîng e. Divê nexşerê, plansazî û bername li benda me ye. Teqez divê em vê biafirînin.”
Temellî, bal kişand ser şert û mecrên Rêber Apo û wiha axivî: “Gelo em ê çawa aştiya civakî pêk bînin? Bêguman em ê li Îmraliyê destpê bikin. Divê şert û mercên xebatê yên Serok bên başkirin da ku tevli pêvajoyê bibe. Ji ber ku sermuzakerevan e.” Temellî got ku divê komîsyon Rêber Apo ziyaret bike û ev dê bandoreke erênî li pêvajoyê bike.
