Serokwekîlê Koma Partiya Demokrasî û Wekheviyê ya Gelan (DEM Partî) Sezaî Temellî li meclîsê civîna çapemeniyê lidar xist û bûyerên di rojevê de nirxand.
Temellî bal kişand ser pênaseya welatîbûna wekhev û anî ziman ku firsenda ji bo ‘welatîbûna wekhev’ hatiye bidestxistin, divê ji dest neyê berdan.
Temellî işaret bi komîsyona li meclîsê kir û got, “Li vê derê derfet heye ku ev hiqûq bê afirandin. Maseyeke xurt a danûstandinan heye. Lê belê afirandina şert û mercên şeklî têrê nake. Divê naveroka vê bê xurtkirin û di vê çarçoveyê de kar bê kirin. Niha dema wê ye. Divê komîsyon meseleyê bi cidî binirxîne. Divê komîsyon zanibe bê karekî çiqasî cidî dike. Dem hatiye ku bala xwe bide ser meseleya esasî. Belê fonksiyoneke xwe ya pir pir girîng heye. Ji bo bicihanîna vê jî divê gavên pêwîst biavêje.”
Temellî anî ziman ku komîsyonê li heyeta gundarî kir, vê hefteyê jî wê heyet bên û heta nava meha Îlonê guhdarîkirina li heyetan wê dewam bike.
KARÊ ESASÎ YÊ KOMÎSYONÊ SERERASTKIRINÊN HIQÛQÎ YE
Temellî bi dewamî got, “Tevlîbûna civakê li komîsyonê girîng e. Her wiha komîsyon divê xwe bigihîne beşên cuda û nêrîn û pêşniyarên wan werbigire. Lê belê karê esasî yê komîsyonê ev nîne. Ev yek dikarîbû bi destê komîsyoneke jêrîn bihata kirin, yan jî bi komîsyoneke cuda ev pêvajo dikarîbû bihata meşandin. Karê esasî yê ku divê komîsyon bike amadekirina pêşnûmeyên li ser sererastkirinên hiqûqî yên pêwîst ên vê demê ye. Ji bo amadekirina van pêşnûmeyan jî pêwîstî bi karekî fedakarî heye.”
Temellî astengkirina axaftina bi Kurdî ya Dayikên Aştiyê ya li Meclîsê weke ‘şermekê’ pênase kir û destnîşan kir ku divê meclîs dawî li vê şerma xwe bîne.
‘DIVÊ KOMÎSYON BI RÊK Û PÊK HEVDÎTINÊ BI ABDULLAH OCALAN RE BIKE’
Sezaî Temellî destnîşan kir ku ji bo komîsyon bi pêş ve biçe divê hevdîtinê bi Rêber Apo re bike û got, “Komîsyon divê bi rêk û pêk hevdîtinê bi Birêz Ocalan re bike ku muxatabê esasî yê meseleyê ye. Rê û rêbazên van hevdîtinan divê tavilê bêne peydakirin. Komîsyona ku bi Ocalan re hevdîtinê neke nikare bi pêş ve biçe. Ev hevdîtin wê çareserkirina pirsgirêkên din û karên komîsyonê hêsan bike, wê pêşî lê veke.”
Temellî destnîşan kir ku ji bo ev hevdîtin bêne kirin divê hemû alî bi berpirsyarî tevbigerin.
