Komîteya TEV-Çandê bi wesîleya salvegera şehadeta sînemager û şoreşger Mazdek Ararat (Omer Bagci) daxuyaniyek weşand.
Mazdek Ararat ê ku bi nasnameya xwe ya sînemager derket pêş, di heman demê de li Şoreşa Rojava kadroyekî gelparêz, li Akademiya Hunerê ya Şehîd Yekta Herekol mamoste û li çiyayên Kurdistanê jî gerîlayekî azadiyê bû.
Daxuyaniya TEV-Çandê ya derbarê şehîd Mazdek Ararat bi vî rengî ye:
“Em rêhevalê xwe, Mazdek Ararat, bi rêz, hurmet û hezkirineke mezin, bibîr tînin. Rêheval Mazdek, bi eşq û vîneke mezin; kete rêya bi rûmet a Têkoşîna Azadiya Kurdistanê û heya şehedata xwe bi israr meşiya.
Digot; ‘Di dawiyê vê rêyê de, ronahî heye. Lewre; ya rast ew ku mirov bimeşe.’ Belê; ya rast meşa ber bi azadiyê ve ye; ber bi ronahiyê ve ye. Di vê serdema ku ew qas bêheqî, bêdadî û zordestî lê belav bûye de; rawestan şaş e; ya rest meş e; meşa Mazdek e.
Rêheval Mazdek, bi navê xwe yê rast; Omer Bagci, sînemagerekî şoreşger bû. Lê di heman demê de di berxwedaniya Kobanê de şervan bû; li Akademiya Hunerê ya Şehîd Yekta Herekol de mamoste bû, di nav şoreşa Rojava de kedkarekî gelparêz bû, hevalê zarokan rêhevalê jinan bû; li çiyayê Kurdistanê jî gerîlayekî azadiyê bû; mîlîtanekî Apoyî bû.
Rêheval Mazdek, zelal û xwerû bû; bi qasî berfa serê Sîpanê; pak bû. Dilnizm bû; dilaram bû; her dem bi rûkeniyeke bedew li jiyan û têkoşînê nêriya. Di heman demê de wêrek û tolhildêr bû; kîna zilm û neheqiya dijmin her di dil de bû; Têkoşer bû.
Rêheval Mazdek, yek ji damezrînerên Komîna Film a Rojava bû. Kedeke mezin di rêxistinkirin û perwerdekirina hezkiriyên sînemayê li Rojava de kir; film nîşan dan; ders dan, film çêkirin … Ji şopdarên Şehîd Xelîl Dag bû; xwesteka wî ya mezin temamkirina projeye BAKUR ê hevalê Xelîl bû …
Şehadeta rêheval Mazdek me pir xemgîn kir. Lê ew qas jî îdîa û israra me ya meşa azadiyê xurt û geş kir. Meşa hevalê Mazdek meşa ber bi azadî û ronahiyê; ber bi rastî, bedewî û başiyê ve bû. Em jî, wek rêheval û şagirtên Mazdek, dê vê meşê bidomînin û biser bixin. Mîrateya ku şehîd Mazdek û bi dehan şehîdên TEV-Çand’ê ji me re hiştine; wê ji me re her û her bingeha bîr, bawerî û moralê bin. Em careke din, bi hezkirineke mezin, bi rêz û hurmet, bi bêrîkirineke bêdawî, rêheval Mazdek Ararat bibîr tînin.”
