Tevgera Jinên Azad (TJA) bi dirûşma “Dema jinê ye, dema azadiyê û xwegihandina Rêberê azad e” di 19’ê Nîsanê de ber bi Gemlîkê ve dimeşe. Ji Kurdistan û Tirkiyeyê wê hezar jin tevlî meşê bibin. Jinên ji Amedê beşdarî meşê bibin wê li Qada Şêx Seîd dest bi çalakiya xwe bikin.
Aktîvîsta TJA’yê parêzer Gulşen Demîr qala armanca bingehîn û peyamên meşê kir û bal kişand ser daxwaza hevdîtinê ya jinan û nîqaşên li ser statuya Îmraliyê. Gulşen Demîr got, “Divê li Îmraliyê aliyê civakî yê hevdîtinê bê pêkanîn” û bang lir ku gavên hiqûqî û mirovî bi lez bêne avêtin.
Gulşen Demîr ragihand ku ji bo rêveçûna pêvajoyê divê gavên şênber tavilê werin avêtin û destnîşan kir ku jin di vê mijarê de bi mîsyona pêşengiyê radibin. Demîr anî ziman ku ji 27’ê Sibatê û vir ve ji bo avakirina aştiyê jin têkoşîneke çalak dimeşînin û li her derê li qadan e. Aktîvîsta TJA’yê diyar kir ku têkoşîn û ked îro jî dewam dike û got, meşa Gemlîkê jî wê li ser vê bingehê pêk were.
Gulşen Demîr bi bîr xist ku 14 meh di ser bangê re derbas bûne lê belê hîn jî gaveke şênber nehatiye avêtin û ev yek jî li nava civakê dibe sedema bêbaweriyê. Demîr anî ziman ku hevdîtina bi Rêber Apo re yek ji daxwazên sereke yên jinan e û axaftina xwe bi vî rengî dewam kir: “Jin zanin ku hevdîtina bi Birêz Abdullah Ocalan re çiqasî girîng in. Divê mercên heyî yên li Îmraliyê bêne sererastkirin, jin di vê mijarê de dengê xwe bilind dikin. Ji bo biichanîna biryarên Dadgeha Mafên Mirovan a Ewropayê divê gav werin avêtin. Bi taybetî em li benda bicihanîna hiqûqa heyî ne. Belê bi parêzer, malbat an jî endamên komîsyonê re hevdîtin têne kirin. Lê belê ji bo mercên karkirinê yên Birêz Abdullah Ocalan bêne afirandin gavên esasî nayên avêtin. Di vê mijarê de jin dixwazin dengê xwe bilind bikin.
‘LI GEMLÎKÊ NAVEROKA ESASÎ WÊ AVAKIRINA AŞTIYÊ BE’
Gulşen Demîr diyar kir ku jin bi rêyên demokratîk daxwazên xwe tînin ziman û meşa beriya niya ha li Enqereyê bi bîr xist ku bi pêşengiya TJA’yê hate lidarxistin. Gulşen Demîr anî ziman ku di 19’ê Nîsanê de wê ber bi Gemlîkê ve meşeke din bê lidarxistin û got, “Ji Tirkiye û Kurdistanê wê hezar jin beşdarî vê meşê bibin. Ji bo bilêvkirina daxwazan bi rêyên demokratîk gelekî girîng e ku jin dakevin qadan û dengê xwe bilind bikin.”
‘HEVDÎTIN WÊ PÊVAJOYÊ BI LEZ BIKE’
Gulşen Demîr dema piştî 27’ê Sibatê weke “dema jinê” pênase kir û anî ziman ku jin wê daxwazên xwe jinûve bînin ziman. Gulşen Demîr ji bo pêvajoya aştiyê bi lez bi pêş ve biçe işaret bi girîngiya diyalog û muzakereyê kir û destnîşan kir ku Rêber Apo di vê pêvajoyê de weke muzakerevanê sereke tê dîtin. Gulşen Demîr anî ziman ku ew bawer dikin, hevdîtin wê tevkariyê li pêvajoya aştiyê û civaka demokratîk bike.
Gulşen Demîr got, “Ya rast, muxatabê esasî yê avakirina aştiyê ew bi xwe ye. Gel, hem gelê Tirk hem gelê Tirkiyeyê hem jî gelê Kurdistanê daxwazên cidî dikin. Muxatabê sereke ew e. Belê, eger ev statu bê naskirin û hevdîtin bê kirin wê lez ji pêvajoyê re bê dayin, daxwaz wê bi giranî pêk wwerin. Yek ji armancên bingehîn ên vê meşê jî ev e. Ji xwe yek ji daxwazên bingehîn ên meşa me mafê hêviyê ye.
Her cûre hevdîtinên bi Birêz Ocalan re bê kirin wê pêvajoyê bilezîne û pêvajoya aştî û civaka demokratîk bi pêş ve bibe. Bi qanûnên entegrasyonê re gelên Tirkiyeyê hemû wê bikevin nava aramiyê, wê jiyaneke hîn bi kêfxweşî bijîn. Lê belê ji bo vê jî beriya her tiştî divê hevdîtin bi Birêz Ocalan re bêne kirin.”
‘ALIYÊ CIVAKÎ YÊ HEVDÎTINAN DIVÊ BÊ PÊKANÎN’
Gulşen Demîr got, “Weke ku me got, hevdîtin têne kirin; lê belê divê aliyê gel ê van hevdîtinan jî bê pêkanîn” û diyar kir ku di vê meşa xwe de ew dixwazin van daxwazên xwe bi rengekî demokratîk bilêv bikin. Lewma jî bang li jinan hemûyan kir ku piştgiriyê bide meşa wan.
