Beriya niha bi 14 salan di 28’ê Kanûna 2011’an de li gundê Roboskî yê navçeya Qilaban a Şirnexê, di encama bombardûmana balafirên şer ên Hêzên Çekdar ên Tirk de 34 sivîl hatin qetilkirin ku 19 ji wan zarok bûn. Kesên di komkujiyê de hatin qetilkirin li ser gora xwe hatin bîranîn.
Li gel malbatên Roboskî Hevserokê Giştî yê DBP’ê Keskîn Bayindir, Hevseroka Giştî ya DEM Partiyê Tulay Hatîmogûllari, nûnerên Komeleya Mafên Mirovan, KESK, ESP, Baroyan, partiyên siyasî û rêxistinên girseyî yên demokratîk tevlî bîranînê bûn.
‘BILA BERPIRSYAR BÊNE EŞKEREKIRIN, HESAB BÊ PIRSÎN’
Tulay Hatîmogûllari li bîranînê axivî û bi bîr xist ku piraniya mirovên hatin kuştin zarok bûn û destnîşan kir ku Roboskî nehatiye jibîrkirin, wê neyê jibîrkirin. Hatîmogûllari got, “Kenê wan nîvco ma, lîstikên wan nîvco ma, dibistanên wan nîvco ma. Zarok û ciwanên ku ji bo karibe debara malbata xwe bikin neçar man ji sînor derbas bibin, bi bombardûmaneke giran hatin qetilkirin.”
Hatîmogûllari bi bîr xist ku piştî komkujiyê dewletê xwe li bêdengiyê danî û got, “14 sal in em dipirsin; wê rojê di civîna Desteya Ewlekariyê ya Mîllî de li ser Roboskî hate axaftin? Divê ev yek bê eşkerekirin. 24 saetan daxuyaniyek bi tenê jî nehate dayin. Piştre gotin, ‘îstîxbarata şaş’ û ‘qezaya operasyonê’. Ne lêborînek, ne sersaxiyek, ne jî darizandinek hate kirin.”
Hatîmogûllari bi dewamî got, “Eger îstîxbarata şaş be, wê demê kê ew îstîxbarat da, divê bê eşkerekirin. Na eger ne welê be hingî kê fermana rabûna balafiran û fermana lêdanê da. Bila ew bê eşkerekirin û darizandin.” Hatîmogûllari destnîşan kir ku Roboskî sûcê li dijî mirovahiyê ye.
Tulay Hatîmogûllari işaret bi Pêvajoya Aştî û Civaka Demokratîk kir ku ji aliyê Rêber Apo ve hate destpêkirin û got, “50 sal in xwîn li vê xakê dirije. Em dibêjin êdî bes e. Em aştiyê dxiwazin. Aştiyeke bi rûmet jî tenê bi rûbirûbûna li heqîqetê û êşê dibe.”
Hatîmogûllari anî ziman ku rûbirûbûna bi Roboskî re şertê pêşî yê aştiyê ye û got, “Li vî welatî rêya avakirina aştiyê eşkerekirina rastiya Roboskî ye. Pêwîstî bi lêborîneke cidî û rûbirûbûneke cidî heye.”
Hevseroka DEM Partiyê diyar kir ku malbatên Roboskî li gel êşa giran jî aştiyê dixwazin û got, “Bi qasî daxwaza aştiyê ya mirovên dilşewat tiştekî hêja nîne.”
‘DOSYA ROBOSKÎ WÊ NEYÊ GIRTIN’
Hevserokê Giştî yê DEM Partiyê Keskîn Bayindir jî diyar kir ku dosya Roboskî nehatiye girtin, wê neyê girtin û got, “Heta ku edalet neyê Roboskî aştî nayê. Aştî li ser lingekî jî nameşe.”
Bayindir ragihand ku rabirdû nayê jibîrkirin û got, “Heta ku edalet li vê xakê pêk were em ê şopdarê doza Roboskî bin. Em doh li vir bûn, sibe jî em ê li vir bin.”
Di bîranînê de beşdaran qurnefîl danîn ser gorên qurbaniyan. Bîranîn bi duayan bi dawî bû.
