Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari beşdarî civîna xwendekarên zanîngeha Wanê bû û li wir axivî. Tulay Hatîmogûllari bi bîr xist ku wan “Banga Aştî û Civaka Demokratîk” a Rêber Apo bi hemû beşên civakê re nîqaş kirine û ew ê vê yekê bidomînin. Tulay Hatîmogûllari anî ziman ku armanca wan ew e ku serdana 3 milyon malbatan bikin. Tulay Hatîmogûllari bi bîr xist ku ciwanan di têkoşîna tê dayîn de bedelên mezin dane û wiha got: “Ciwan hêza herî girîng a vê pêvajoyê ne.”
Tulay Hatîmogûllari behsa hevdîtina bi Rêber Apo re kir û wiha domand: “Birêz Ocalan di hevdîtinê de got ku êdî dema netew dewletê qedandiye û neçarî hilweşînê ye. Ji bo hilweşîna vê yekê, divê alternatîfek were afirandin. Alternatîf çi ye? Alternatîf, civaka demokratîk e û ji bo civaka demokratîk jî xwe rêxistinkirin pêwîst e.”
CIWAN HÊZA BINGEHÎN IN
Tulay Hatîmogûllari gotina Rêber Apo “Kes tenê nîne, dibe ku kesên ku civaka wan hatibe hilweşandin hebin, lê herî kêm ev kes bi bîranîna civaka hilweşiyayî re ye” bi bîr xist û wiha pêde çû: “Dema ku em li dîroka têkoşînê dinêrin dibînin ku hêza ku wê dimeşîne ciwan in. Ji ber vê yekê rêxistinkirina ciwanan a ji bo civaka demokratîk pir girîng e. Gava ku ciwan hewl didin xwe rêxistin bikin, her gava ku hewl didin hebûna xwe nîşan bidin, mixabin ew bi rûyê herî zalim ê pergalê re rû bi rû dimînin. Rêya meşandina têkoşînek bihêztir di perwerdehî û îdeolojiyê de derbas dibe. Dema ku em vê yekê pêk bînin, wê hemû êrîşên sîstemê li diwar biqelibin. Rêya bingehîn a civaka demokratîk xwe rêxistinkirine.”
‘CIWAN WÊ CIVAKA DEMOKRATÎK BI RÊXISTIN BIKIN’
Tulay Hatîmogûllari diyar kir ku bendewariyeke mezin a Rêber Apo ji ciwanan heye û wiha got: “Yên ku wê civaka demokratîk bi rê ve bibin û bi rêxistin bikin, ciwan in. Banga Aştî û Civaka Demokratîk tê wateya meşandina têkoşîna ciwanan a yekgirtî, demokratîk a li dijî faşîzmê. Ev yek hem ji bo gelê Kurd û hem jî ji bo hemû gelan jiyanî ye. Ciwan hêza dînamîk in, li cihên ku ciwan lê rêxistin bûne, ji xeta çalakî û hişmendiyê encam tê girtin. Tişta ku Birêz Abdullah Ocalan di vê bangê de anî ziman ew e ku divê her kes rêxistiniya xwe misoger bike û bi rêxistiniya xwe ya cewherî civakê veguherîne û demokratîk bike. Di vî alî de erk û berpirsiyariyeke mezin dikeve ser milê hevalên me yên ciwan. Di heman demê de bi çalakiya pratîkî re divê xeta xwe ya îdeolojîk û hişmendiyê ava bikin. Ev yek erk û berpirsyariya me hemûyan e.”
Piştî axaftina Tulay Hatîmogûllari civîn ji çapemeniyê re girtî dom kir.
