Nerazîbûnên li hemberî binçavkirina Hevşaredarên Şaredariya Akdenîzê ya di bin rêbeberiya Partiya Wekhevî û Demokrasiyê ya Gelan (DEM Partî) Hoşyar Sariyildiz û Nûriye Aslan û endamên meclîsa şaredariyê Ozgur Çaglar, Neslîhan Orûç, Yakûp Daniş û Hîkmet Bakirhan berdewam dikin. Li pêşiya avahiya şaredariya nobeta protestokirina desteserkirina şaredariyê berdewam dike û di çalakiyê de gelek caran dirûşmeyên; ‘’Em ê bi têkoşînê ser bikevin’’, ‘’Em ê rê nedin qeyûman’’ û ‘’Qeyûm wê biçin, em ê bimînin’’ hatin berzkirin. Heyeta ku Hevseroka Giştî ya DEM Partiyê Tulay Hatîmogûllari jî di nav de serdena gelê ku li pêşiya avahiya şaredariyê nobet da destpêkirin, kir.
Tulay Hatîmogûllari, di çalakiyê de axivî û ev yek anîn ziman: ‘’Duh Hevşaredarên me yên Şaredariya Akdenîzê û endamên me yên meclîsê hatin binçavkirin. Hevalên me hê jî di bin çavan de ne. Ne pêkan e ku em vê yekê qebûl bikin. Jixwe vê zîhniyeta xespê senaryoyên têkildarî Şaredariya Akdenîzê beriya mehan amade kirine. Ev feraset û zîhniyeta desteserkirinê li hemberî îradeya gel weke derbeyekê ye. Derbe bi bikaranîna daraz, polîs û misyona siyasî pêk hatiye. Em vê derbeya li hemberî Akdenîzê bi tu awayî qebûl nakin. Em bi têkoşîn û berxwedêriyê hatin van rojan. Me li hemberî tu tiştî û tu kesan serê xwe netewandiye û em natewînin jî.
Ez duh li Wanê bûm. Li Wanê navendeke koordînasyona bobelatan hate vekirin. AKOM. Em beşdarî vekirina wê bûn. Min di axaftina xwe ya duh de jî diyar kir. Hevşaredarên me ji bo vê yekê hatine hilbijartin. DEM Partî ji bo xizmeta gel û bajaran hate hilbijartin. Lê belê zîhniyeta qeyûman careke din nîşanî me dan ku li hemberî îrade û dengên gel derbeyek hate kirin. Ev yek li hemberî mafê gel ê hilbijartinê derbe ye. Em bi tu awayî vê yekê qebûl nakin. Li vir gelên Kurd, Tirk û Ereb di nava aşitî û aramiyê de bi hev re dijîn. Hevşaredar û endamên me yên meclîsa Şaredariya Akdenîzê yên bi dengên gelên Ereb, Tirk û Kurd hatine hilbijartin, niha hatine binçavkirin. Em weke gel vê xespa li dijî îradeyê qebûl nakin.
Weke ku hûn jî dizanin ji 1’ê Cotmehê ve ye têkildarî çareseriya pirsgirêka Kurd hin geşadan hene. Têkildarî vê yekê li aliyekî hevdîtin pêk tên û li aliyekî jî şaredariyên me tên desteserkirin. Ew ê nikaribin mafê gelê yê hêvîdardarbûnê ji destê gel bistînin. Lê belê bila ev yek jî were zanin ku bi desteserkirina şaredariyan dengê aşitiyê bilind nabe. Em ji herkesî zêdetir daxwaza aşitiyê dikin. Ji bo aşitiyê me bi dayîna berdêlên mezin li ber xwe da û em ê li ber xwe bidin jî. Dilsozî û baweriya me ya ji bo aşitiyê gelek mezin in. Lê belê em desteserkirina şaredariyan qebûl nakin. Li aliyekî qala aşitiyê dikin û li aliyekî jî bombeyan dibarînin ser Rojava. Ne pêkan e ku em vê yekê qebûl bikin.
Em ji bo aşitiyê li ber xwe didin, ew pêngavên ji bo aşitiyê jehrî dikin; ne pêkan e ku em vê yekê qebûl bikin.
Hem îradeya gel xesp dikin hem jî çavkaniyên şaredariyan desteser dikin. Bila hevalên me werin berdan, qeyûmên hatine tayînkirin ji wezîfeya wan werin dûrxistin. Ji bo xwedîderketina îrade, aşitî û demokrasiyê em minetdarê we ne.’’
