Partiya Wekhevî û Demokrasiyê ya Gelan (DEM Partiya DEM) a Mêrsînê li saloneke dawetê ya li navçeya Toroslar a Mêrsînê şeva hevgirtinê li dar xist. Hevseroka DEM Partiyê Tulay Hatîmogullari, nûnerên rêxistinên demokratîk û gelek welatî beşdar bûn. Bername bi deqeyek rêzgirtina ji bo bîranîna kesên ku di têkoşîna azadî û demokrasiyê de jiyana xwe ji dest dane dest pê kir.
Hevserokên DEM Partî ya Mêrsînê Bedriye Kûş û Reşat Aşan beşdaran silav kirin û hêviya xwe ya ji bo pêvajo bi aştiyek bi rûmet bi dawî bibe anîn ziman. Hevserokan daxwaza berdana girtiyên siyasî û şaredariyên ku hatine desteserkirin dîsa radestî gel bikin, kirin. Hevserokan diyar kirin ku ew ji bo banga Rêber Apo bigihînin gel tax bi tax dixebitin û anîn ziman ku serketina vê pêvajoyê dê rê li ber azadiya gelê Kurd û gelên Rojhilata Navîn veke.
Piştre Hevseroka Giştî ya DEM Partiyê Tulay Hatîmogullari axivî û bal kişand ser girîngiya banga dîrokî ya Rêber Apo ya 27’ê Sibatê. Hatîmogullari danî ziman ku ev bang bi taybetî ji bo gelê Kurd û hemû bindestên li Tirkiyeyê perspektîfa aştî û çareseriyê pêşkêş dike û bi bîr xist ku PKK di vî warî de rêzegavên dîrokî avêtiye.
‘EM LI BENDÊ NE KU JI BO BÊÇEKKIRINÊ QANÛNEKE TAYBET WERE DERXISTIN’
Tulay Hatîmogullari bal kişand ser komîsyona ku li meclisê hatiye damezrandin. Tulay Hatîmogullari destnîşan kir ku ji bo pêvajoya bêçekkirinê bi lez bibe divê qanûneke taybet were derxistin û wiha domand: “Em li benda destpêkirina pêvajoya derxistina qanûnan e. Em di serdemeke ku qanûnên heyî yên li Tirkiyeyê nayên bicîhanîn û rêgezên Destûra Bingehîn têne binpêkirin de debas dibin. Di pêvajoyek wisa de, em li bendê ne ku ji bo bêçekkirin bi lez bibe qanûnek taybet were derxistin.”
‘DIVÊ REJÎMA QEYÛMAN JI HOLÊ WERE RAKIRIN’
Tulay Hatîmogullari li ser rejîma qeyûman rawestiya û diyar kir ku divê rejîma qeyêman di çarçoveya Pêvajoya Aştî û Civaka Demokratîk de bi tevahî were bidawîkirin. Tulay Hatîmogullari xwest ku şaredariyan dîsa radestî şaredarên hatine hilbijartin were kirin û operasyonên li dijî şaredariyên CHP’ê jî rexne kir. Tulay Hatîmogullari wiha domand: “Em careke din dibêjin ku divê hemû şaredarên hilbijartî vegerin ser karên xwe. Divê zexta dadwerî ya li ser muxalefetê demildest bidawî bibe. Divê hilbijêrên ku ji kar hatine dûrxistin begerin ser karê xwe û şaredariyan radestî îradeya gel bikin. Gel îradeya xwe dixwaze.”
Tulay Hatîmogullari bal kişand ser rewşa girtiyên nexweş û got: “Divê girtiyên nexweş demildest werin berdan. Li gelek girtîgehan, lijneyên çavdêriyê hîn jî berdana girtiyan asteng dikin. Ev yek nayê qebûlkirin. Divê demildest dawî li vê pêkanînê were û biryarên Dadgeha Mafên Mirovan a Ewropayê û Dadgeha Destûrî bên bicihanîn. Niha, divê em rê paqij bikin. Dema ku rê paqij dibe, divê pêşî qanûnên aştî û entegrasyona demokratîk ên ku me behs kir werin derxistin. Aştî wê li van axan bi ser bikeve, demokrasî wê bi ser bikeve, gel wê bi ser bikeve.”
Tulay Hatîmogullari di dawiya axaftina xwe de bal kişand ser rola jinan a di pêvajoya aştiyê de û diyar kir ku bê jinan aştî nayê avakirin. Tulay Hatîmogullari destnîşan kir ku jin di civaka demokratîk de kirdeya esasî ne û jinên ku li Rojava berxwe didin silav kir.
Şeva hevgirtinê bi stranên hunermend Şîrîn Kaya bi dawî bû.
