Hevseroka Giştî ya Partiya Demokrasî û Wekheviyê ya Gelan (DEM Partî) Tulay Hatîmogûllari di civîna koma partiya xwe ya heftane de li meclîsê mijarên di rojevê de ne nirxand.
Tulay Hatîmogûllariyê di destpêka axaftina xwe de komkujiya Kizilderê û Samandag a Hatayê bi bîr anî û got: “Mahîr Çayan û hevrêyên wî ji bo darvekirina Denîz Gezmîş, Huseyîn Înan û Yusuf Aslan canê xwe feda kirin. Jiyana wan a şoreşgerî û têkoşîna rêya sosyalîst û welatparêzên Kurdistan û Tirkiyeyê ronî dike. Mehmet Latîfecî ku li Samandagê hat qetilkirin jî şagirtê Hîkmet Kivilcimli bû û sosyalîstekî Ereb bû. Li navçeya Samandagê Serokiya DEPê kir. Li dijî polîtikayên asîmîlasyonê ji bo nasnameya Elewiyên Ereb têkoşiya. Ji Kizildere heta Samandagê em hemû hevrêyên xwe yên windakirinê bi bîr tînin û têkoşîna wan dê di bîra me de zindî be.”
Tulay Hatîmogûllari diyar kir ku li çar aliyên Kurdistanê, Tirkiye û Rojhilata Navîn gelan agirê Newrozê pêxist û geş kirin û wiha dirêjî da axaftina xwe: “Newroza Îsal ji hemû Newrozan girseyîtir bû, ket nava rûpelên dîrokê. Newroza sala 2026an bû Newrozeke avakar. Ew Newroz nîşaneya xwedîderketina bi milyonan kes a ji bo banga dîrokî ya 27ê Sibatê ye. Ji dewlet û desthilatê re 5 peyamên girîng dan. Bi milyonan mirovan azadiya fizîkî ya birêz Ocalan daxwaz kirin. Em jî li vir peyama gelê xwe di parlamentoyê de tînin ziman û dibêjin gelê me û em azadiya birêz Ocalan dixwazin. Teqez divê şert û mercên xebata azad a birêz Ocalan pêk were. Yek jî hemû gelan daxwaza aştiyê kir û xwedî derket. Bi milyonan Kurd jî xwedî li yekitiya demokratik derketin û ew peyam dan. Ji hemû dewletên serdest re jî peyama wekhevî û azadiyê dan. Bi milyonan daxwaza demokratik kirin û li dijî zimanê qirêj ê medyayê jî peyam dan. Weke DEM Partî heta dawî em li pişt banga milyonan in. Desthilat divê li gorî peyamên bi milyonan kes tevbigere. Heke gavên rast werin avêtin aştî jî dê pêk were û demokrasî jî.”
Tulay Hatîmogûllari nerazîbûn nîşanî binçavkirin û girtinên piştî Newrozê pêk hatin da û xwest demildest kesên hatine girtin bên berdan. Tulay Hatîmogûllari destnîşan kir ku gelek kes û bi taybet 2 welatî rastî êşkenceyê hatine û got ku ew li rex kesên rastî êşkence hatine ne û li dijî êşkenceyê radibin. Tulay Hatîmogûllari bal kişand ser pêvajoya Aştî û Civaka Demokratîk û axaftina xwe wiha domand: “Em di merhaleya 2’yemîn a pêvajoyê de ne. Divê ew merhale bi gavên qanûnî bê şênberkirin. Ji bo aştî û demokrasiyê divê demildest gavên şênber bên avetin. Birêz Ocalan di banga Aştî û Civaka Demokratîk de siyaseta demokratik xurt kiriye û deriyê wekheviyê vekiriye. Heyeta me jî bi birêz Ocalan re hevdîtinek pêk anî. Di vê civînê de nirxandinên birêz Ocalan ji bo komara demokratîk girîng in. Heyeta me peyama birêz Ocalan bi raya giştî re parve kir. Birêz Ocalan di peyama xwe de bal kişand ser vê yekê; Çareserî bi qebûlkirina nasname û bi civakê re avakirina entegrasyona demokratîk e. Komar bi demokrasiyê xurt dibe û beşdarbûna komarê ji bo hemû gelan li ser bingeha nasname û azadiyê be.”
Tulay Hatîmogûllari destnîşan kir ku divê demildest qanûnên aştiyê xurt dike bên amadekirin û wiha pê de çû: “Divê desthilat, parlamento û dewlet jî li gor merhaleya 2yemîn a pêvajoyê gavên qanûnî biavêje. Heke gav neyên avêtin baweriya civakê bi pêvajoyê nayê û bawerî dişkê. Civak li benda avêtina gavan e. Hê jî parlamentoyê tu xebat nedane pêş xwe. Geşedanên li Rojhilata Navîn çareseriyê li ser me ferz dike. Ji bo avêtina gavan divê li benda encama pêvajoya Îranê neyê hiştin. Ji bo wê banga me ji desthilatê û dewletê ew e ku divê takvîmek ji bo avêtina gavan bê diyarkirin û bi raya giştî re bê parvekirin. Her wiha di gavên ku hewcedarî bi çêkirina qanûnan nîn e de jî divê dewlet gavan biavêje. Li gorî biryarên Dadgeha Mafê Mirovan a Ewropa divê girtiyên siyasî bên berdan. Gavên ku pêvajoya aştiyê xurt bike divê demildest bên avêtin. Divê girtiyên pîr û kal û nexweş demildest bên berdan. Polîtîkaya qeyiman bi dawî bibe. Pêşiya siyaseta demokratik, azadiya fikir û remanê bê vekirin. Em dixwazin ku desthilat bi cesaret tevbigere. Em ji bo aştiyê amade ne ku canê xwe jî bidin. Di serî de gelê Kurd û hemû gelên Tirkiyeyê divê azad bibin û bigihîjin mafên xwe yên ziman û çandî.”
Tulay Hatîmogûllari derbarê şerê li Îranê û êrişa li dijî mala Serokê Herêma Kurdistanê Nêçîrvan Barzanî jî axivî û êriş şermezar kir. Tulay Hatîmogûllari diyar kir ku bi vê yekê dixwazin Herêma Kurdistanê bikişînin nava şer û wiha axivî: “Divê ev êriş rawestin û belavî qadeke din nebin û berfireh nebe. Herêma Kurdistanê ne bi tenê ye û heta dawî em li rex wan in. Berdela êrişên Îsraîl û Amerikayê yên li dijî Îranê, hemû gelên li herêmê dide.”
Hevseroka DEM partiyê di dawiya axaftina xwe de anî ziman ku krîza aborî her ku diçe dijwartir dibe û divê desthilat polîtîkayên xizaniyê ji holê rake bide pêş xwe û got, ew her tim li rex karker û cotkaran e.
