Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari piştî civîna Lijneya Rêveberiya Navendî (MYK) ku piştî girtina Şaredarê Esenyurt a Stenbolê Ahmet Ozer û tayînkirina qeyûm a li şûna wî hat lidarxistin, li ber avahiya Rêxistina DEM Partiyê ya Esenyurtê daxuyanî da.
Hatîmogûllari, got ku ew rejîma qeyûm pir baş nas dikin û wiha got: “Ji ber ku ev rejîma qeyûm li bajarên kurdan û li dijî hilbijêrên kurd û kesên demokrasîxwaz hat cîbicîkirin. Qeyûman ji ewil li şaredariyên HDP’ê staj kirin û piştre jî lki zanîngeh û kargehan jî hatin tayînkirin. Diviya li dijî qeyûmên ewil bertekeke xurt bihata nîşandan. Me hêj wê demê gotibû ku dê ev qeyûm li bajarên rojavayên Tirkiyeyê jî bên ceribandin. Vaye em mafdar derketin.”
Hatîmogûllari, axaftina xwe wiha domand: “Şaredariya Esenyurtê ku mezintirîn navçeya Tirkiyeyê ye, bi rêbaza Lihevkirina Bajar hate bidestxistin. Ji bo Tirkiyeyê bûbû modêla şaredarvaniyê. Îktîdarê bi darbeya li dijî xelkê Esenyurtê re bêtehemûliya xwe ya li hemberî Lihevkirina Bajar nîşan daye. Qeyûm, rejîmeke darbeyê ye. Qeyûm, xespkirina îradeya gel e. Binpêkirina mafê bijartin û hilbijartinê ye. Qeyûm, rejîma dijdemokratîk e, derhiqûqtî ye. Tiştên îro li dijî şaredar Ahmet Ozer hatine kirin, li dijî îradeya xelkê Esenyurtê hatine kirin.
Sindoq, îradeya gel e. Dîsa li dijî îradeya gel operasyon li dar xistin. Em duh jî li dijî van operasyonan û zîhniyetê têkoşiyan, wê îro jî têbikoşin. Ji bo me tu wateya yên operasyon kirin û qeyûmê hatiye tayînkirin tune ye.
Ahmet Ozer rûmeta civakê ye. Akademîsyen, zanyar û şaredareke ku bi îradeya gel hatiye hilbijartin. Kesekî wiha bi îdiayên vala û îdianameyeke bêbingeh hate binçavkirin û girtin. Îradeya ku ev operasyon kirî jî îradeya li Enqere û qesrê ye. Qesr, şaredariyên ku nikare bi dest bixe hewl dide bi rêya qeyûman xesp bike.
Heke li şûna kesên hatine hilbijartin qeyûm bên tayînkirin, navê vê rejîmê rejîma otorîter e. Zîhniyeta qeyûmperest, bi mentiqa rantê nêz dibe. Ji bo ranta li vir qeyûm tayîn kirin. Çavkaniyên şaredariyê mîna xizînyetê pêşkeşî alîgirên xwe dikin. Lewma qeyûm tayîn kirin. Wê têkoşîna me ya li dijî rejîma qeyûm bidome. Yên qaşo destê ‘aştiya navxweyî’ dirêj dikn, bi operasyona li dijî Şaredariya Esenyurtê re derbe li aştiyê kirin.
Gelên me yên hêja; ji bo ku sibe dusibe dîsa li şaredariyên cuda qeyûm neyên tayînkirin, divê em bibin yek. Dem dema yekitiyê ye, dem dema wê ye ku em bi hev re û bi awayekî xurt daxwaza demokrasî û aştiya civakî bikin.
Dema me agahî bihîstî, me biryar da ku MYK’a xwe li Stenbolê bicivînin. Me civîna xwe li dar xist. Ji bo li dijî qeyûm em aştiya civakî biparêzin û nexşerêya xwe diyar bikin em civiyan. Em ê niha jî ji bo dîsa ji qeyûm re bibêjin na dê ber bi qadê ve bimeşin.”
